პრესტიჟული Bruno Gala-ს ვენაში გამართულ, რიგით 28-ე დაჯილდოებაზე ქართველი ფეხბურთელი, ოთარ კიტეიშვილი, ავსტრიის ბუნდესლიგის გასული სეზონის საუკეთესო ფეხბურთელად დასახელდა.

Bruno Gala 1997 წლიდან იმართება და გამარჯვებულის გამოსავლენად ხმას ავსტრიაში მოთამაშე ფეხბურთელები აძლევენ. ოთარ კიტეიშვილი შტურმ გრაცის კაპიტანია. გასულ სეზონში კიტეს კაპიტნობით შტურმმა ავსტრიის ბუნდესლიგაში ზალცბურგის დომინაცია დაასრულა და 2010/11 სეზონის შემდეგ ავსტრიის ჩემპიონი პირველად გახდა. 2019/2020 წლებში ეს ჯილდო არც მეტი, არც ნაკლები, ერლინგ ჰოლანდმა მიიღო, რომელიც მაშინ ზალცბურგში ირიცხებოდა.

გასულ სეზონში ოთარ კიტეიშვილმა 25 მატჩი ჩაატარა და 9 გოლსა და 6 საგოლე გადაცემას მოუყარა თავი.