გამოცემა Politico ოფიციალურ წყაროებზე დაყრდნობით წერს, რომ ირლანდიის ამჟამინდელი პარლამენტარი რუსეთის დაქირავებული აგენტი აღმოჩნდა. მას, სავარაუდოდ, რომანტიკული ხასიათის კავშირი ჰქონდა რუსეთის დაზვერვის აგენტთან.

ოპოზიციონერი დეპუტატი, ძირითადად, NATO-ს საწინააღმდეგო, ისევე როგორც პროპაგანდისტულ გზავნილებს ავრცელებდა, იგი ჩრდილოეთ ირლანდიის ექსტრემისტულ ჯგუფებთან ამყარებდა კონტრაქტს. ირლანდიის პრემიერ-მინისტრის, საიმონ ჰარისის თქმით, მას ეს ფაქტი საერთოდ არ უკვირს.

მედიის ცნობით, ირლანდიელი დეპუტატი რუსეთის აგენტების წრეს, ჯერ კიდევ 2019 წელს შეუერთდა. იმავე პერიოდში, რუსეთი ირლანდიასა და ბრიტანეთს შორის Brexit-სთან დაკავშირებული დაძაბულობის გაღრმავებას ცდილობდა, განსაკუთრებით, ჩრდილოეთ ირლანდიის ბრიტანულ რეგიონში.

ირლანდიის პრემიერ-მინისტრი კითხვაზე მუშაობს თუ არა რუსული დაზვერვის აგენტი ირლანდიის პარლამენტში, უპასუხა, რომ ინფორმაციას ვერ დაადასტურებს, თუმცა დასძინა, რომ “ეს არავისთვის უნდა იყოს გასაკვირი”.

რუსულ ჯაშუშობაში ეჭვმიტანილისთვის არც ბრალი წაუყენებიათ და არც დაუპატიმრებიათ, რადგან "კრემლის აგენტებთან ურთიერთობისას, რომლებიც დუბლინში რუსეთის საელჩოში მუშაობენ — მას არ ჩაუდენია რაიმე დანაშაული”. პარლამენტარის ვინაობა ჯერ-ჯერობით უცნობია.

ირლანდიის პრემიერ-მინისტრმა ის ფაქტიც ახსენა, რომ რუსეთის მხრიდან მსგავსი ქმედებები 2022 წლის რუსეთ-უკრაინის ომის დაწყებიდან მოხშირდა. ირლანდიამ ამავე წლიდან მოყოლებული ოთხი რუსი დიპლომატი გააძევა ქვეყნიდან, მათ ირლანდიის პოლიტიკურ და ბიზნეს წრეებში დაზვერვის აგენტების დაქირავებაში ედებოდათ ბრალი. შედეგად, მოსკოვმა ათეულობით ირლანდიელ პოლიტიკოსს აუკრძალა რუსეთის საზღვრების გადალახვა.

"რუსეთი საზოგადოებრივი აზრის დამახინჯებას მთელს მსოფლიოში ცდილობს, არც ირლანდიაა ამისგან დაზღვეული”, — ამბობს ჰარისი.

ირლანდიიდან გაძევებული ოთხივე დეპუტატი რუსული სამხედრო დაზვერვის (ГРУ) წევრი იყო. ფიქრობენ, რომ ეჭვმიტანილი დეპუტატი, სავარაუდოდ, ამ ოთხიდან ერთ-ერთმა, სერგეი პროკოპიევმა დაიქირავა.

The Sunday Times-ის ცნობით, გაძევების შემდეგ პროკოპიევი ირლანდიელ დეპუტატთან რუსი აგენტის მეშვეობით ინარჩუნებდა კონტაქტს. აგენტი დეპუტატთან, პერიოდულად, რომანტიკული ხასიათის კონტაქტს ამყარებდა.

ოფიციალური პირების ინფორმაციით, პოლიციის გაფრთხილების მიუხედავად, პარლამენტარი მაინც აგრძელებდა რუსული სამსახურების პირებთან კონტაქტს. ჯერ-ჯერობით, გამოძიების შედეგად, მისი მხრიდან არ არის აღმოჩენილი რაიმე სახის საიდუმლო ინფორმაციის შემცველი საბუთები ან ფულის აღების მტკიცებულება.