ტერაბანკი საქართველოს აგრარული უნივერსიტეტის ბაკალავრიატის დამამთავრებელი კურსის სტუდენტებს სწავლას დაუფინანსებს. ინიციატივის ჭრილში, ბანკი საქართველოს აგრარული უნივერსიტეტის ბაკალავრიატის სტუდენტებს, რომლებსაც პრაქტიკული საგნის, „აგრო პროექტის“ ფარგლებში საუკეთესო აკადემიური მოსწრება ექნებათ, მეოთხე კურსის მეორე სემესტრის გადასახადს დაუფარავს.

ტერაბანკი ახალგაზრდების განათლებისა და აგროსექტორის განვითარების აქტიური მხარდამჭერია. აგროფორუმი, რომელიც ტერაბანკთან პარტნიორობით, აგრარულ უნივერსიტეტში 26 სექტემბერს ჩატარდა, ერთ-ერთი საგნის, „აგრო პროექტის“ ნაწილია. მისი სწავლება მთელი სემესტრის განმავლობაში ერთწლიანი კულტურების მოყვანას გულისხმობს, მოსავლის პრეზენტაციას კი სტუდენტები აგროფორუმზე მართავენ. ღონისძიებაზე მოწვეულ სტუმრებს შორის იყვნენ აგროკომპანიების წარმომადგენლები და უნივერსიტეტის კურსდამთავრებულები.

აგროფორუმის მონაწილე 17 სტუდენტს ტერაბანკმა, როგორც ღონისძიების პარტნიორმა, ბრენდირებული სამახსოვრო ნივთები გადასცა. აგროფორუმზე საქართველოს აგრარული უნივერსიტეტის რექტორმა, ვახტანგ ლეჟავამ და აგრონომიისა და ლანდშაფტის მენეჯმენტის სკოლის დეკანმა, თეო ურუშაძემ, აუდიტორიას სიტყვით მიმართეს და პარტნიორ კომპანიებს პროექტში მონაწილეობისთვის მადლობა გადაუხადეს.

სტუდენტებისთვის აგრარული განათლების დაფინანსება ტერაბანკის კორპორაციული სოციალური პასუხისმგებლობის მნიშვნელოვან მიმართულებებს — ახალგაზრდების სწავლისა და ზოგადად აგროსექტორის განვითარების ხელშეწყობას ეხმიანება.

„ჩვენთვის ორმაგად სასიხარულოა, რომ ამ დარგის მიმართ სტუდენტების ინტერესი და მათი მონაწილეობა სხვადასხვა პროექტში იზრდება. სწორედ ამიტომ, გადავწყვიტეთ, კიდევ უფრო დიდი მოტივაცია მიგვეცა ახალგაზრდებისთვის, რათა მათ სამომავლო საქმიანობა აგროსექტორს მეტი ენთუზიაზმით დაუკავშირონ“, - აცხადებს მარკეტინგის მენეჯერი სალომე გიორგაძე.

ახალგაზრდების განათლების მხარდამჭერი ინიციატივების განხორციელებას ტერაბანკი მომავალშიც განაგრძობს.