პარტია „გახარია - საქართველოსთვის“ ლიდერი, გიორგი გახარია ადასტურებს, რომ ის საქართველოში IRI-ის ხელმძღვანელ ჯონი დიპიროს შეხვდა, მაგრამ შეხვედრა არა გუშინ, არამედ 3-4 დღის წინ შედგა და კოალიცია ძლიერ საქართველოსთან გაერთიანების საკითხი განხილვის თემა არ ყოფილა.

„თქვენ მინდა იცოდეთ, რომ ეს არ მომხდარა გუშინ, ეს იყო, დაახლოებით, 3-4 დღის წინ, როდესაც მე ჯონს შევხვდი. კი, ჩვენ ვხვდებით ხოლმე, ვსაუბრობთ, მე მგონი, ვერავინ აგვიკრძალავს ყავის დალევას. მაშინ ეს არაფერი მომხდარი არ იყო და შესაბამისად, ჩვენი საუბრის თემა და საგანი იყო საერთოდ სხვა. მიმდინარე პოლიტიკურ საკითხებს, რაღაცებს, განვიხილავდით, მაგრამ ეს არ ყოფილა მთავარი თემა,“ — განაცხადა გახარიამ.

ტელეკომპანია იმედმა დღეს გაავრცელა ინფორმაცია, რომ გიორგი გახარია, ანა ბუჩუკურთან ერთად კაფეში ამერიკის შეერთებული შტატების მოქალაქეს, ჯონი დიპიროს შეხვდა, რომელიც საქართველოში IRI-ის ხელმძღვანელია. ქრონიკის ცნობით, სწორედ ამ შეხვედრაზე გიორგი გახარიას ხაზარაძესთან ჩაშლილი მოლაპარაკებების შემობრუნება დაავალეს.