TASS-ის ინფორმაციით, რუსეთის პრეზიდენტმა, ვლადიმერ პუტინმა, სამხრეთ ოსეთთან სამხედრო-ტექნიკური თანამშრომლობის განვითარების შესახებ დოკუმენტი დუმას რატიფიკაციისთვის წარუდგინა. დოკუმენტი დუმის მონაცემთა ბაზაშია განთავსებული.

"რუსეთის ფედერაციასა და სამხრეთ ოსეთს შორის სამხედრო-ტექნიკური თანამშრომლობის განვითარების შესახებ შეთანხმების რატიფიცირებას ხელი მოეწერა 2023 წლის 23 აგვისტოს ცხინვალში", — წერია დოკუმენტში.

დოკუმენტში მოცემულ განმარტებით ბარათსა და მთავრობის დასკვნაში მითითებულია, რომ "ამ შეთანხმების განხორციელება ხელს შეუწყობს სამხედრო-ტექნიკურ სფეროში თანამშრომლობის გაღრმავებას რუსეთის ფედერაციისა და სამხრეთ ოსეთის რესპუბლიკის თავდაცვისუნარიანობის გაძლიერების მიზნით".

განკარგულების მიხედვით, პუტინმა ოკუპირებულ სამხრეთ ოსეთთან შეთანხმების რატიფიკაციისთვის, რამილ საიფუტდინოვი რუსეთის ფედერაციის ოფიციალურ წარმომადგენლად და სამხედრო-ტექნიკური თანამშრომლობის ფედერალური სამსახურის დირექტორის მოადგილედ დანიშნა.

იმავდროულად, ცხინვალის საოკუპაციო რეჟიმმა განაცხადა, რომ "ამ შეთანხმების წყალობით, რუსეთი გახდა სამხრეთ ოსეთში მშვიდობისა და უსაფრთხოების შენარჩუნებისა და მთლიანად რეგიონში დაძაბულობის ესკალაციის პრევენციის გარანტი".