ბიძინა ივანიშვილის დღევანდელი განცხადება გორში ეროვნული სირცხვილია. ამ განცხადებით ქართული ოცნება ემსახურება მხოლოდ რუსეთის ინტერესებს, ძირს უთხრის ოკუპირებული ტერიტორიების არაღიარების პოლიტიკას და ვნებს საქართველოს ეროვნულ ინტერესს, — ასე ეხმაურება ერთიანი ნაციონალური მოძრაობა ბიძინა ივანიშვილის განცხადებას.

ცნობისათვის, ქართული ოცნების საპატიო თავმჯდომარე, ბიძინა ივანიშვილმა გორში, საარჩევნო კამპანიის ფარგლებში გამართულ რეგიონულ ღონისძიებაზე სიტყვით გამოსვლისას განაცხადა, რომ 26 ოქტომბრის არჩევნების დასრულების შემდეგ, როცა "ომის გამჩაღებლები გასამართლდებიან", ბოდიში უნდა მოვიხადოთ იმის გამო, რომ "მოღალატე ნაციონალურმა მოძრაობამ" 2008 წელს ცეცხლის ალში გახვია ჩვენი ოსი დები და ძმები".

ერთიანი ნაციონალური მოძრაობა განცხადებაში წერს, რომ ბიძინა ივანიშვილსა და ქართულმა ოცნებას აქვს ბოდიში მოსახდელი ქართველი ხალხის წინაშე ამ მოღალატეობრივი განცხადებისთვის

"მან [ივანიშვილმა] და ქართულმა ოცნებამ ბოდიში უნდა მოიხადოს ქართველი ხალხის წინაშე ამ მოღალატეობრივი განცხადებისთვის. ასევე იმისთვის, რომ 12 წლის მანძილზე ხალხი გაღარიბდა, ქვეყანა დაიცალა, შობადობა ისტორიულ მინიმუმზეა და საქართველო საერთაშორისო იზოლაციაში მოექცა.

ქართველი ხალხის სიმართლე დადასტურებულია საერთაშორისო სასამართლოების გადაწყვეტილებებით ჰააგასა და სტრასბურგში, ასევე ეუთოსა და ევროპის საბჭოს რეზოლუციებით.

26 ოქტომბერს ქართველი ხალხი გაიმარჯვებს ქართულ ოცნებაზე და ერთიანობითა და ევროკავშირში ინტეგრაციის გზით განახორციელებს მშვიდობიან პოლიტიკას ჩვენი ეროვნული ინტერესების დასაცავად. საქართველო აუცილებლად იქნება ერთიანი და მშვიდობიანი მის საერთაშორისოდ აღიარებულ საზღვრებში", — ნათქვამია ერთიანი ნაციონალური მოძრაობის მიერ გავრცელებულ განცხადებაში.