4 აგვისტოს, მედიასაშუალებებით გავრცელებული ინფორმაციის საფუძველზე, რომლის თანახმად მიხეილ სააკაშვილი პოლონეთში იმყოფებოდა, საქართველოს პროკურატურამ პოლონეთის მხარეს ინტერპოლის არხებით მიმართა. პროკურატურის განცხადების თანახმად, ამ დროისთვის მიმდინარეობს კანონმდებლობით გათვალისწინებული პროცედურები:

"4 აგვისტოს, საქართველოს მთავარმა პროკურატურამ მიხეილ სააკაშვილის საკითხთან დაკავშირებით მიმართა პოლონეთის რესპუბლიკის პროკურატურას. ამავე დღეს, 4 აგვისტოს, ვარშავის ინტერპოლის ეროვნულმა ცენტრალურმა ბიურომ მიიღო ქართული მხარის მიერ გაგზავნილი დოკუმენტაცია, რაც მათი მხრიდან დადასტურებულ იქნა თბილისის ინტერპოლის ეროვნული ცენტრალური ბიუროს წარმომადგენელთან სატალეფონო საუბრისას."

26 ივლისს ამერიკაში ვიზიტისას პოროშენკომ სააკაშვილს ორი წლით წინ მიცემული მოქალაქეობა ჩამოართვა, რაც ნიშნავს იმას, რომ ანულირებულია მისი პასპორტიც. უცნობია, თუ როგორ შეძლო საქართველოს ყოფილმა პრეზიდენტმა ამერიკის დატოვება და ვარშავაში გამგზავრება.

Kyiv Post-ის ცნობით, მიხეილ სააკაშვილი პოლონეთს 3 აგვისტოს რამდენიმე ადგილობრივი დეპუტატის მიწვევით ესტუმრა. იგი ვარშავის აჯანყების 73-ე წლისთავისადმი მიძღვნილ ღონისძიებებს ესწრებოდა.