ფინანსთა სამინისტროს საგამოძიებო სამსახურის განცხადებით, საქართველოს საბაჟო საზღვარზე, განსაკუთრებით დიდი ოდენობით ცოცხალი კიბორჩხალისა და შებოლილი თევზის უკანონოდ გადმოტანის ბრალდებით, სომხეთის მოქალაქე ამხილეს.

გამოძიების თანახმად, აღნიშნულ პირს, სამაცივრე სატვირთო მანქანით, საბაჟო-გამშვები პუნქტის სადახლო-ს გავლით, საბაჟო კონტროლისგან მალულად, სომხეთიდან საქართველოში ტრანზიტულად შემოჰქონდა განსაკუთრებით დიდი ოდენობით ცოცხალი კიბორჩხალა და შებოლილი თევზი.

ფინანსთა სამინისტროს საგამოძიებო სამსახური აცხადებს, რომ წარდგენილი დეკლარაციის თანახმად, სომხეთის მოქალაქეს სხვადასხვა სახის ხილი უნდა გადაეტანა, თუმცა დადგინდა, რომ ხილის გარდა, სატვირთო მანქანით არადეკლარირებული ტვირთი - 10 339 კგ ცოცხალი კიბორჩხალა და 1 110 კგ შებოლილი თევზიც გადაჰქონდა.

უწყების განცხადებით, საგამოძიებო სამსახურის თანამშრომლებმა ამოიღეს საქონელი, რომლის საბაჟო ღირებულება 35 310 ლარს შეადგენს.

საქმეზე მიმდინარეობს გამოძიება საქართველოს სისხლის სამართლის კოდექსის 214-ე მუხლის მეორე ნაწილით, რაც სასჯელის სახით ითვალისწინებს თავისუფლების აღკვეთას ვადით 5-დან 7 წლამდე.