სახელმწიფო ყველაფერს აკეთებდა, რომ აფგან მუხთარლის საქმის გამოძიების იმიტაცია მომხდარიყო და რეალურად არ ყოფილიყო გამოძიებული, — ამის შესახებ ორგანიზაცია "უფლებები საქართველოს" იურისტმა, არჩილ ჩოფიკაშვილმა ბრიფინგზე განაცხადა.

მისი თქმით, ხელისუფლებამ ყველაფერი გააკეთა, რომ ევრო სასამართლოს მხოლოდ პროცედურული დარღვევა დაედგინა, შინაარსობრივ ნაწილში კი შეუძლებელი ყოფილიყო რაიმე გადაწყვეტილების გამოტანა.

"დადასტურდა, რომ საქართველომ ამ ადამიანის მიმართ დაარღვია პოზიტიური ვალდებულება, ეფექტურად არ გამოიძია მისი გატაცების და აზერბაიჯანში გადაყვანის საქმე, რითაც დაირღვა კონვენციის მე-3 მუხლი წამების აკრძალვა და კონვენციის მე-5 მუხლი თავისუფლების უფლება. ჩვენ ყოველთვის ვაცხადებდით, რომ სახელმწიფო ყველაფერს აკეთებდა იმისთვის, რომ მომხდარიყო საქმის გამოძიების იმიტაცია, რეალურად არ ყოფილიყო გამოძიებული. ეს დაადასტურა გადაწყვეტილებამ.

აზერბაიჯანის მიერ დაირღვა კონვენციის მე-5 მუხლი და ასევე კონვენციის მე-8 მუხლი, რაც პირადი ცხოვრების ხელშეუხებლობას გულისხმობს.

მიუხედავად იმისა, რომ საქმეზე გამოძიება 2017 წელს დაიწყო, 7 წელზე მეტია გასული, ევროსასამართლოც ამას იმეორებს, რომ ხელისუფლებამ ვერ დაადგინა მომჩივანმა უკანონოდ გადაკვეთა თუ არა საზღვარი, ან ფიზიკურად შესაძლებელი იყო თუ არა ამის გაკეთება აღნიშნულ ტერიტორიაზე. გარდა ამისა, გამოძიების მნიშვნელოვან პირობებში იყო უმოქმედობა, მტკიცებულებების, განსაკუთრებით ვიდეოკამერების ჩანაწერების არასათანადო გამოკვლევა, ეჭვები რომ განადგურდა გარკვეული ვიდეო ჩანაწერები, გვიან ხდებოდა რეაგირება. დღესაც გაურკვეველია, ბარათაშვილის ქუჩიდან როგორ აღმოჩნდა აზერბაიჯანში, მაშინ, როდესაც ვიდეო კამერების საშუალებით მყისიერი რეაგირება ხდება.

სასამართლომ დაასკვნა, რომ საქართველოს ხელისუფლებამ ვერ შეასრულა პოზიტიური ვალდებულება ჩაეტარებინა ეფექტური, საფუძვლიანი გამოძიება, რაც პროცედურულ ნაწილში მე-3 და მე-5 მუხლის დარღვევად დაადგინა. საფუძვლიანი გამოძიების ჩაუტარებლობის გამო, სასამართლომ შეუძლებლად მიიჩნია განმცხადებლის თბილისიდან გაუჩინარების და აზერბაიჯანში აღმოჩენის ზუსტი გარემოებების დადგენა. ეს არის ზუსტად ის, რომ ხელისუფლებამ ყველაფერი გააკეთა, რომ ევროსასამართლოს მხოლოდ პროცედურული დარღვევა დაედგინა, შინაარსობრივ ნაწილში შეუძლებელი ყოფილიყო რაიმე გადაწყვეტილების გამოტანა", — განაცხადა ჩოფიკაშვილმა.

ევროსასამართლოს გადაწყვეტილება აზერბაიჯანში გატაცებული ჟურნალისტის, აფგან მუხთარლის საქმეზე დღეს გახდა ცნობილი. მუხთარლიმ ადამიანის უფლებათა ევროპულ სასამართლოში საქართველოსა და აზერბაიჯანის წინააღმდეგ დავა მოიგო.ევროსასამართლოს გადაწყვეტილებით, საქართველომ მუხთარლის კომპენსაციის სახით, მორალური ზიანისა და იურიდიული ხარჯებისა და დანახარჯების ასანაზღაურებლად 12 500 ევრო, ხოლო აზერბაიჯანმა 8 500 ევრო უნდა გადაუხადოს.

ამავე თემაზე ნახეთ:

აფგან მუხთარლიმ საქართველოსა და აზერბაიჯანს ევროსასამართლოში დავა მოუგო