პარლამენტის პლენარულ სხდომაზე ლგბტ უფლებების შემზღუდველ, "ოჯახური ღირებულებებისა და არასრულწლოვანის დაცვის შესახებ" საკანონმდებლო პაკეტს მეორე მოსმენით განიხილავენ. გირჩის დეპუტატმა, ვახტანგ მეგრელიშვილმა კანონპროექტის მომხსენებელს, ქართული ოცნების წევრს, თენგიზ შარმანაშვილს ჰკითხა, რა შინაარსს დებენ კონკრეტულად ოჯახის ღირებულებებში და იმ რისკებისა და საფრთხეების დასახელება მოსთხოვა, რისგანაც არასრულწლოვნები უნდა დაიცვან.

"ოჯახური ღირებულებების დაცვაში იგულისხმება - ოჯახი რა არის, კონსტიტუციაშიც განმარტებულია. ეს არის ქალისა და კაცის ერთობა, ოჯახის შექმნის მიზნით. ეს არის მთავარი ღირებულება, საქართველოს კონსტიტუციისთვის ოჯახს რა წარმოადგენს და რას ეძახის ოჯახს. ყველაფერი, რაც ამ განმარტების მიღმაა და ამის აღსრულებას ხელს შეუშლიდა, ამ კანონში თავმოყრილია და მის დაცვას ემსახურება.

რაც შეეხება არასრულწლოვანთა დაცვას - მაგალითად, კინოთეატრში, სადაც გადის ისეთი ტიპის ფილმი, სადაც ერთნაირსქესიანთა ინტიმური ურთიერთობებია აღწერილი, იქ არასრულწლოვანს არ შეუშვებენ. ეს არის ამ კანონში" — უპასუხა შარმანაშვილმა.

პლენარულ სხდომაზე კანონპროექტს მეორე მოსმენით კენჭს დღეს, 4 სექტემბერს უყრიან.