საერთაშორისო გამჭვირვალობა — საქართველო (TI) ახალ კვლევას აქვეყნებს.

კვლევის მიხედვით, მუნიციპალური შპს ბორჯომის კეთილმოწყობის დირექტორის მოვალეობის შემსრულებლის, ჯემალ გოგოლაძის შვილს, ზურაბ გოგოლაძეს, 2019-2024 წლებში უკონკურენტოდ მოგებული ტენდერებით და პირდაპირი შესყიდვებით 800 568 ლარი აქვს მიღებული.

ჯემალ გოგოლაძე 2022 წლის აპრილიდან შპს ბორჯომის კეთილმოწყობის დირექტორის მოვალეობის შემსრულებელია. 2017 წელს კი ამავე უწყების სატენდერო კომისიის წევრიც იყო.

2019 წლის 21 მარტს, მისმა შვილმა ზურაბ გორგილაძემ შპს წყალსადენი 2012 დააფუძნა და თვენახევარში, ბორჯომის მერიიდან სარწყავი არხის მოსაწყობად პირდაპირი შესყიდვაც მიიღო. შპს წყალსადენი 2012-ს, 2019-2023 წლებში, 17 პირდაპირი შესყიდვით 462,341 ლარი დაერიცხა. კომპანიამ ყველა შესყიდვა ბორჯომის მერიიდან სოფლის მხარდაჭერის პროგრამის ფარგლებში, ძირითადად სასმელი წყლის მილსადენების, ასევე სანიაღვრე არხების მოწყობა-რეაბილტიაციისთვის მიიღო.

კვლევაში ასევე აღწერილია 2020-2024 წლებში მიღებული შემოსავლები და ამ შემოსავლის მიღების გზები;

TI - ის ცნობით, 2020 წელის 22 დეკემბერს ზურაბ გოგოლაძე ინდივიდუალურ მეწარმედ დარეგისტრირდა. ორ დღეში, 24 დეკემბერს ააიპ ბორჯომის დასუფთავებისა და კეთილმოწყობის 60,000-ლარიანი ტენდერი, უკონკურენტოდ მოიგო. მან 2020-2024 წლებში ბორჯომის მუნიციპალური ააიპ-ების ყველა (9) ტენდერი უკონკურენტოდ მოიგო და აქედან ჯამურად 320,000 ლარი მიიღო. ასევე, ბორჯომის მერიამ და მისმა იურიდიულმა პირებმა 6 პირდაპირი შესყიდვის ხელშეკრულებები გაუფორმეს 18,227 ლარზე. როგორც ინდივიდულურმა მეწარმემ, ჯამურად 338,227 ლარის 15 სახელმწიფო შესყიდვა მიიღო, ძირითადად, სატრანსპორტო საშუალებებისა და მასთან დაკავშირებული მოწყობილობების შეკეთებაზე.

საერთაშორისო გამჭვირვალობა - საქართველო პროკურატურასა და სახელმწიფო უსაფრთხოების სამსახურის ანტიკორუფციულ სააგენტოს სწრაფი რეაგირებისკენ მოუწოდებს.