შემოდგომა წიგნებში ჩაძირვისთვის იდეალური სეზონია, ნოსტალგიური თუ სევდიანი განწყობა, რომელიც ამ დროისთვის დამახასიათებელ ნიშნადაა ქცეული, გარკვეულ სიმყუდროვესაც ქმნის, გრძელი ღამეები კი საკუთარ თავთან ხანგრძლივად დარჩენის კარგი შესაძლებლობაა.

ამ სტატიაში გაგიზიარებთ წიგნებს, რომლებიც თქვენს შემოდგომას ბევრად საინტერესოსა და თავგადასავლებით სავსე პერიოდად აქცევს.

1. გაბრიელ გარსია — მარკესი პატრიარქის შემოდგომა

კოლუმბიელი მწერლის, გაბრიელ გარსია მარკესის ეს რომანი 1975 წელს გამოიცა და იგი ესპანეთში ყველაზე პოპულარული წიგნი იყო.

წიგნი დიქტატორის შესახებაა, რომელიც დაუსრულებლად მართავს ქვეყანას. გარშემო ყველაფერი იცვლება, წლები გადის, თაობები იცვლება, მაგრამ ის ისევ ცოცხალი და უცვლელია.

აღსანიშნავია, რომ გაბრიელ გარსია მარკესმა ამ რომანით მოახერხა ის, რაც ვერ შეძლო ვერცერთმა ლათინოამერიკელმა ავტორმა: მან დაწერა მონუმენტური რომანი არა რომელიმე კონკრეტულ დიქტატორზე, მის ცხოვრებაზე, სისუსტეებსა თუ მარცხზე, არამედ გააერთიანა ყველას გამოცდილება, შეკრიბა დიქტატორთა სახეები და შექმნა დიქტატორის ზოგადი, უნივერსალური პორტრეტი.

2. კამილო ხოსე სელა — პასკუალე დუარტეს ოჯახი

ესპანელი ნობელიანტი მწერლის, კამილო ხოსე სელას რიგით პირველი მოთხრობაა, რომელიც, თავდაპირველად, 1942 წელს გამოქვეყნდა.ესპანურმა გაზეთმა El Mundo-მ ის გასული საუკუნის 100 საუკეთესო ესპანურენოვან ნაწარმოებს შორის დაასახელა.

მისი გმირები საზოგადოებისგან გარიყულ მდგომარეობაში ცხოვრობენ და მათი ცხოვრება ტანჯვისა და ტკივილის გუბეშია ჩაძირული. მიუხედავად იმისა, რომ მოთხრობას მრავალი მთხრობელი ჰყავს, მთავარი მათგანი მაინც პასკუალე დუარტეა, რომელიც ამბავს საკუთარი სოფლის დიალექტზე ჰყვება.

აღსანიშნავია, რომ ნაწარმოებმა საფუძველო ჩაუყარა ე.წ. Tremendismo-ს მოძრაობას, რომელთა ტექსტებიც, ძირითადად, ფოკუსირებულია პერსონაჟების მოპყრობაზე და ძალადობრივი სცენებით გამოირჩევა.

რომანი ესპანურიდან ლამარა თურმანიძემ თარგმნა.

3. ივა ფეზუაშვილი — მასკარაფონე

მასკარაფონე ივა ფეზუაშვილის ტრილოგიის (ფსკერის სახარება, 2019 წ; ბუნკერი, 2020 წ.) მესამე, ფინალური რომანია.

წიგნი საქართველოს უახლესი ისტორიის გარდამტეხი მოვლენების შესახებაა და მასზე ერთგვარ დაკვირვებას წარმოადგენს. ამ წიგნთან ყველას, ვისაც 90-იანი წლების საქართველოში უცხოვრია გარკვეული ემოციური და ფსიქოლოიგური ბმა აქვს, რადგან წიგნში ვხვდება თაობა, რომლებიც ყოველდღიურად იბრძვიან უდარდელობის, თავისუფლებისა და სიყვარულისთვის.

მასკარაფონემ 2023 წელს წლის საუკეთესო რომანის ნომინაციაში ლიტერატურული პრემია "საბა" მიიღო.

4. მეგი ნელოსნი — არგონავტები

"სუბიექტი, რომელიც ამბობს 'მიყვარხარ', იმ არგონავტს ჰგავს, რომელიც გემს განაახლებს, მაგრამ სახელს არ გამოუცვლის. შეყვარებული ადამიანის მიერ წარმოთქმული 'მიყვარხარ' 'არგოს' ჰგავს, რომლის ნაწილებიც დროთა დინებაში გამოიცვლება, სახელი კი იგივე რჩება.ამ სიტყვის მნიშვნელობა ყოველი წარმოთქმისას, ყოველი კონკრეტული ვითარების თანახმად უნდა იცვლებოდეს, რადგან თავად სიყვარულისა და ენის დანიშნულება ისაა, რომ ერთსა და იმავე ფრაზას მუდამ ახალი შინაარსი შესძინოს."

ამერიკელი მწერალი და პოეტის მეგი ნელსონი ამ წიგნით არამხატვრული ლიტერატურის ახალ ფორმას აყალიბებს და ჩვენს დროში აქტუალურ თემებს ყოველდღიური პირადი გამოცდილებით ნაკარნახევ სიუჟეტებში ასახავს. ეს წიგნი ფილოსოფიური თეორიებისა და მემუარების გაერთიანებას წარმოადგენს. წიგნი თავად ავტორის ტრასნგერნდერ მხატვართან ჰარი დოჯთან რომანტიკული ურთიერთობის შესახებ მოგვითხრობს და გვაჩვენებს რამდენად რთული, სასიამოვნო და ამავე დროს, სასტიკი შეიძლება იყოს იდენტობის ძიების გზა.

წიგნი ინგლისურიდან ხათუნა ცხადაძემ თარგმნა.

5. ტარიელ ჭანტურია — ორი საბანი

არცერთი სეზონი არ უხდება ისე პოეზიას, როგორც შემოდგომა, შესაბამისად, ამ ჩამონათვალში აუცილებლად უნდა მოხვედრილიყო პოეტური კრებულიც.

ტარიელ ჭანტურიას ნოვატორული, სტილისტურად მრავალფეროვანი და მრავალმხრივ აქტუალური პოეზია დღემდე ინარჩუნებს განსაკუთრებულ ადგილს ქართულ პოეზიაში, ეს წიგნი კი ერთგვარი კალეიდოსკოპია, რჩეული ფერების, ზომის და ფორმის მინის ნამსხვრევებით. თითოეული გვერდის გადაშლა კალეიდოსკოპის დატრიალებას ემსგავსება – განწყობების ცვლა იუმორიდან სევდაში, გროტესკიდან სენტიმენტში, პარადოქსიდან აქსიომაში, რიტმიდან დისონანსში...