რუსული კანონის წინააღმდეგ საკითხის განხილვას საკონსტიტუციო სასამართლოში დღეს, 11:00 საათზე დაიწყო.

საკონსტიტუციო სასამართლოში პრეზიდენტს ოთხი წარმომადგენელი, მათ შორის ეკა ბესელია და გიორგი ბურჯანაძე წარმოადგენენ. სიტყვით გამოსვლისას ეკა ბესელიამ განაცხადა, რომ ეს კანონი უნდა გაუქმდეს, რადგან მისი გაკეთილშობილება შეუძლებელია.

საკონსტიტუციო სასამართლოში მიმდინარე პროცესზე, სხდომის თავმჯდომარის, მერაბ ტურავას კითხვაზე — შუამდგომლობის დაკმაყოფილების შემთხვევაში რა პოზიტიური შედეგი შეიძლება მოჰყვეს კანონის შეჩერებას სახელმწიფოსთვის, ეკა ბესელიამ უპასუხა, რომ კანონის შეჩერება ხელს შეუწყობს შეჩერებული ევროინტეგრაციის პროცესის განახლებას.

“კანონის შეჩერება რაღაც მიზანს ემსახურება, რა მიზანს ემსახურება ეს თქვენთვის?” — ეკითხება ტურავა ბესელიას.

“საქართველოს ევროინტეგრაციის პროცესი შეჩერებულია. მისი თავიდან აცილება შესაძლებელია სწორედ იმიტომ, რომ ახლა საკონსტიტუციო სასამართლოს შეუძლია აჩვენოს, რომ მას შეუძლია ამ ზიანის და საფრთხის დანახვა და ქვეყნისთვის აცილება.

მე მჯერა, ისევე როგორც ახლა თქვენ გიყურებთ, რომ ეს კანონი მაინც გაუქმდება. თუ ამას გააკეთებთ სასწრაფოდ და მალე, ქვეყანას იმ მოსალოდნელ ზიანს ააცილებთ, რომელიც ყოველდღიურად დგას და აქვს განგრძობითი ხასიათი“, — უპასუხა ბესელიამ.