ევროკავშირის უმაღლესმა წარმომადგენელმა, ჯოზეფ ბორელმა სასწრაფო, სამდღიანი ჰუმანიტარული ცეცხლის შეწყვეტა მოითხოვა ღაზას სექტორში იმისთვის, რომ სწრაფად გავრცელებადი დაავადების პოლიოვირუსის ვაქცინირება შეძლონ.

"მე ვითხოვ, 3-დღიან ჰუმანიტარულ ცეცხლის შეწყვეტას იმისთვის, რომ შესაძლებელი იყოს ვაქცინაცია, რომელიც მსოფლიო ჯანდაცვის ორგანიზაციის (WHO) და UNICEF-ის მიერ ჩატარდება. ეს მოთხოვნა იქნება ფართომასშტაბიანი მოლაპარაკებებისგან სრულიად დამოუკიდებელი. ეს კაცობრიობის მოთხოვნაა", — წერს ჯოზეფ ბორელი X-ზე.

მეორე ჯგუფის პოლიოვირუსი (cVDPV2) ღაზას სექტორში პირველად ივლისში დაფიქსირდა. 16 აგვისტოს, პირველი შემთხვევა 10 თვის ბავშვს დაუდასტურდა. ის დღემდე პარალიზებულია, თუმცა მისი მდგომარეობა ამ დროისთვის სტაბილურია.

პოლიოს სახელით ცნობილი დაავადება ადამიანში შეუქცევად პარალიზების პროცესს იწვევს.

"პოლიოს სწრაფი გავრცელება ემუქრება ღაზაში მყოფ ბავშვებს, რომლებიც უკვე დასუსტებულები არიან მუდმივი გადაადგილებით, არასრულფასოვანი კვებითა და დეპრივაციით", — ამბობს ბორელი.

ჰუმანიტარული მისიის წარმომადგენლები ამბობენ, რომ ღაზაში დაავადებების ახლიდან აფეთქება ომის დამანგრეველი ზემოქმედების დამსახურებაა. ომმა ჩაშალა ვაქცინაციის პროგრამები, დააბინძურა წყალი და სანიტარიული სისტემები.

EuroNews-ის ინფორმაციით, მსოფლიო ჯანდაცვის ორგანიზაციამ მოუწოდა ყველა მხარეს, რომ გაიყვანონ ჯარები, რათა შესაბამისმა სამსახურებმა ვაქცინაციის პროცესი აწარმოონ. ისრაელისა და ღაზას ჯანდაცვის მაღალჩინოსნებზე დაყრდნობით, ორშაბათს, 640,000-ზე მეტი ბავშვის აცრის მიზნით, 1.2 მლნ დოზაზე მეტი ვაქცინა იყო გაგზავნილი ღაზაში.

გამოცემის თქმით, გაეროს პალესტინელი ლტოლვილების სააგენტო (UNRWA) ორგანიზაციებს აფრთხილებს, რომ ისრაელის ხელისუფლება უხეშად არღვევს ჰუმანიტარულ შეთანხმებებს.

"ხალხს არსად აქვს წასასვლელი, აქ ვერსად იპოვი უსაფრთხო ადგილს. ასევე მწირია ჰუმანიტარული რესურსები, ჰუმანიტარული ოპერაციები კი მუდმივი ევაკუაციის პირობებში სათანადოდ ვერ ხორციელდება", — თქვა ლუიზ უოტერიჯმა, UNRWA-ს კომუნიკაციების უფროსმა ოფიცერმა.

არასამთავრობო ორგანიზაცია, Human Rights Watch ამბობს, რომ მასობრივი გადაადგილების ბრძანებები, ისევე როგორც გაუთავებელი თავდასხმები ჯანდაცვის ინფრასტრუქტურაზე და წყლის მარაგზე, ამწვავებს "პოტენციურად კატასტროფულ პოლიოს ეპიდემიურ აფეტქებას" ომის შედეგად დანგრეულ ანკლავში.

EuroNews-ის ცნობით, ხუთშაბათს ბორელი არაფორმალურ შეხვედრაზე მოიწვევს ევროკავშირის საგარეო საქმეთა მინისტრებს ბრიუსელში, სადაც დღის წესრიგში იქნება ღაზაში მიმდინარე ომი.

ევროკავშირი ღაზაში ჰუმანიტარულ პაუზას მარტიდან ითხოვს.