საქართველოს პატრიოტთა ალიანსის წევრის, ადა მარშანიას თქმით, "უცნაური იქნებოდა" საქართველოში ჩამოსულ დუმის დეპუტატს, არტიომ კავენიოვს რომ არ შეხვედროდნენ. ამის შესახებ მარშანიამ On.ge-ს განუცხადა. საქართველოში დუმის დეპუტატის ვიზიტი შესახებ ინფორმაცია პირველად რუსთავი 2-მა გაავრცელა.

კავენიოვი ის დეპუტატია, რომელსაც პატრიოტთა ალიანსი მოსკოვში ვიზიტის დროს შეხვდა. მარშანია ამბობს, რომ დუმის დეპუტატთან "სასიცოცხლო საკითხებზე" კერძო, არაოფიციალური შეხვედრა ჰქონდათ და საუბრის დეტალებს ამ მიზეზით არ ამხელს. მისი თქმით, კავენიოვი მათი პარტიის მიპატიჟებით არ ჩამოსულა, თუმცა პატრიოტთა ალიანსის მოსკოვში ვიზიტის დროს შეხვედრისას მათ 2 აგვისტოს ჩამოსვლის შესახებ ესაუბრა.

"ეს იყო კერძო ვიზიტი ამ ადამიანის პატრიარქის [ილია მეორე] ანგელოზის დღესთან დაკავშირებით ჩამოვიდა. იმიტომ, რომ ძალიან უყვარს ჩვენი პატრიარქი და პატივს სცემს მას", - განუცხადა On.ge-ს მარშანიამ და დასძინა, რომ დუმის დეპუტატი რუსეთის სასულიერო პირებთან ერთად ჩამოვიდა.

მარშანიამ არ იცის, როდის ჩამოვლენ რუსი დეპუტატები მათი მოწვევით საქართველოში. მისი თქმით, მათ ჩამოსვლას სჭირდება მომზადება.

პატრიოტთა ალიანსის რამდენიმე წევრი რამდენიმე კვირის წინ მოსკოვში იყო და დუმის დეპუტატების ნაწილს შეხვდა. შეხვედრის შემდეგ, ადა მარშანიამ განაცხადა, რომ რუს დეპუტატებს რუსეთ-საქართველო-ნატოს ფორმატის შექმნა შესთავაზეს, ისაუბრეს ვიზების გამარტივებისა და სხვა საკითხებზე.