ძალიან მაგარი სამსახურია, არა? სუპერ-გმირული. დედამიწას იცავს უცხოპლანეტელების შემოჭრისგან. ალბათ საოცარი ფორმა გაქცია, სუპერ-გალაქტიკური იარაღი გაქვს... მთლად ასეც არა, მაგრამ ნასა რეალურად ეძებს „პლანეტური დაცვის ოფიცერს". ვაკანსიის შევსება აქედან შეგიძლიათ.

ეს პოზიცია საკმაოდ მაღალი რანგისაა და ხელფასიც კარგია - $187 ათასი! ისე, თუ გავალებენ, რომ დედამიწა უნდა დაიცვა უცხოპლანეტელების შემოჭრისგან, ძუნწებიც არ უნდა იყვნენ და კარგად უნდა გადაგიხადონ. არა?

ეს პოზიცია მას შემდეგ შეიქმნა, რაც 1967 წელს „გარე კოსმოსის ხელშეკრულებას“ მოეწერა ხელი. ის ადამიანებს ავალდებულებს, რომ კოსმოსის გამოკვლევისას არ დააბინძურონ პლანეტები, მთვარეები ან სხვა ობიექტები და, ყველაზე მთავარი, არ დააბინძურონ დედამიწა კოსმოსიდან შემოსული არამიწიერი მიკრობებით.

ხელშეკრულების თანახმად, ნებისმიერ კოსმოსურ მისიას თანხმობა მხოლოდ და მხოლოდ მაშინ მიეცემა, თუ უცხო პლანეტის დაბინძურების შანსი ერთია 10 ათასიდან.

„პლანეტური დაცვის ოფიცრად“ სრულ განაკვეთზე, ამჟამად, ორი ადამიანი მუშაობს - ერთი NASA-ში, მეორე კი ESA-ში (ევროპის კოსმოსური სააგენტო). ასე რომ, ექსკლუზიურ სამსახურს გთავაზობთ, რომელშიც უნარ-ჩვევები და გამოცდილება სპეციფიკურია. დამშვიდდით, არავინ მოგთხოვთ უცხოპლანეტელებისგან პლანეტის დაცვაში სტაჟს.

აუცილებელია მაღალი აკადემიური ხარისხი მეცნიერებაში, ინჟინერიაში ან მათემატიკაში ან კომბინაცია სამუშაო გამოცდილებასთან, მინიმუმ ერთი წელი უნდა გქონდეთ ნამუშევარი მაღალ სახელმწიფო თანამდებობაზე, უნდა გქონდეთ დიდი გამოცდილება ინჟინერიაში და ღრმა ცოდნა პლანეტის დაცვის სფეროში. ასევე უნდა დაამტკიცოთ, რომ გაქვთ უნარი დაგეგმოთ, თვალყური ადევნოთ და აღასრულოთ ნაციონალური მნიშვნელობის კოსმოსური პროგრამები.

პოზიცია მოიცავს მსოფლიოს გარშემო მოგზაურობას კოსმოსური სადგურების სანახავად იმ აღჭურვილობების შესასწავლად, რომელიც მომავალი მისიებისთვის იქნება გამოყენებული: მაგალითად, Mars 2020 ან Europa Clipper.

მინდა გახაროთ, რომ საქართველოს მოქალაქეებმა სულ ტყუილად წაიკითხეთ ამდენი: ამ პოზიციაზე რომ დაინიშნოთ, ამერიკის მოქალაქე უნდა იყოთ.