მიხეილ თამარაშვილის გამზირსა და ჭაბუა ამირეჯიბის გზატკეცილის გადაკვეთაზე პანდუსების მოწყობის სამუშაოები მიმდინარეობს. სამუშაოების ღირებულება 1,7 მილიონი ლარია. სამუშაოებს ინფრასტრუქტურის განვითარების საქალაქო სამსახური ახორციელებს.

თბილისის მერის, კახა კალაძის განცხადებით, აღნიშნული სამუშაოები პირდაპირ თამარაშვილის ქუჩასთან დააკავშირებს გზის ამ მონაკვეთს და გადაადგილება უფრო უსაფრთხო იქნება და ის დაბრკოლებები, რომელიც არსებობდა, მოიხსნება.

„სამუშაოები უკვე დასასრულს უახლოვდება. მაგალითად, თამარაშვილის ქუჩიდან ამირეჯიბის გზატკეცილზე ჩასასვლელი უკვე გახსნილია, გაკეთებულია, დაგებულია ასფალტის ქვედა ფენები. სამუშაოები სექტემბრის დასაწყისში დასრულდება და აღნიშნული კვანძი მოემსახურება დედაქალაქის მოსახლეობას.

მოეწყობა ტროტუარები, დამონტაჟდება შუქნიშნები, რათა გადაადგილება იყოს უსაფრთხო. აქ პრობლემას წარმოადგენდა ის, რომ ახალი გზიდან გამოსული ავტომობილები ხელს უშლიდა საზოგადოებრივ ტრანსპორტს და ამის გამო იქმნებოდა დიდი პრობლემები. ამ კვანძის მოწყობით ეს პრობლემები მოიხსნება“, — განაცხადა კახა კალაძემ.