ოკუპირებული აფხაზეთის დე ფაქტო სახელმწიფო სამსახურმა 20 აგვისტოს გაავრცელა განცხადება სადაც, 17 აგვისტოს, გალის რაიონის სოფელ მეორე ოტობაიაში, საქართველოს ორი მოქალაქის, რემიკო და მურთაზ ჭითანავების, დაკავების შესახებ იუწყება.

ე.წ. უწყების თქმით, ორივე დაკავებულს "აფხაზეთში ბინადრობის ნებართვა ჰქონდათ" და სხვებს საზღვრის გადაკვეთაში ეხმარებოდნენ.

დე ფაქტო უწყების განცხადებაში წერია, რომ "დაკავებულთა მფლობელობაში არსებულ სახლებში აღმოჩენილია: ხელყუმბარა F1, ხელყუმბარა ргд 5, ტროტილი 1600 გრ, პლასტიდი 45 გრ, სხვადასხვა კალიბრის ვაზნები, ასევე დოლარის კუპიურების დასტა".

საქართველოს სახელმწიფო უსაფრთხოების სამსახურმა ამ თემაზე განცხადება გაავრცელა, სადაც ნათქვანმია, რომ უკანონო დაკავების ფაქტზე ჟენევაში საერთაშორისო პარტნიორებს აცნობეს, ამოქმედებულია ყველა არსებული მექანიზმი და აქტიურად მიმდინარეობს მუშაობა აღნიშნული პირების დაუყოვნებლივ გათავისუფლების მიზნით."

სუს-ის ცნობით, საოკუპაციო რეჟიმის წარმომადგენლებმა, საქართველოში ევროკავშირის სადამკვირვებლო მისიის (EUMM) მიერ ოპერირებული ცხელი ხაზის მეშვეობით, უკანონო დაკავების ფაქტი დაადასტურეს და განაცხადეს, რომ აღძრულია ე.წ. სისხლის სამართლის საქმე უკანონო მიგრაციის ორგანიზების ე.წ. ბრალდებით და უკანონოდ დაკავებულ ორივე პირს, ე.წ. სასამართლოს მიერ ორთვიანი წინასწარი პატიმრობა მიესაჯა. ამჟამად დაკავებულები ე.წ აფხაზეთის სახელმწიფო უშიშროების სამსახურის იზოლატორში იმყოფებიან.

"საოკუპაციო რეჟიმის მიერ განხორციელებული უკანონო დაკავებები ართულებს ადგილობრივი მოსახლეობის ყოველდღიურ ცხოვრებას და უკიდურესად აზიანებს უსაფრთხოების გარემოს. აღნიშნულიდან გამომდინარე, მნიშვნელოვანია უკანონოდ დაკავებული პირის უპირობო გათავისუფლება", — წერია უწყების განცხადებაში, სადაც ასევე აღნიშნულია, რომ საქართველოს ოკუპირებულ რეგიონებსა და საოკუპაციო ხაზის გასწვრივ განხორციელებულ ყველა დესტრუქციულ ქმედებაზე პასუხისმგებლობა ეკისრება საოკუპაციო ძალას.

ამჟამად ოკუპირებულ აფხაზეთში უკანონო პატიმრობაში რჩება საქართველოს კიდევ ორი მოქალაქე:

ქრისტინე თაკალანძე, რომელსაც ოკუპირებული აფხაზეთის ე.წ. უზენაესმა სასამართლომ 10 წლითა და 6 თვით პატიმრობა მიუსაჯა "ჯაშუშობის" ბრალდებით

ირაკლი ბებუა, რომელიც დე ფაქტო სასამართლომ „სახელმწიფო სიმბოლიკის შეურაცხყოფის“, „სხვისი ქონების განზრახ დაზიანებისა“ და „საბრძოლო მასალის უკანონოდ შენახვის“ მუხლებით გაასამართლა და 2020 წლის 7 დეკემბერს 9 წლით თავისუფლების აღკვეთა მიუსაჯა.