HBO-ის გახმაურებული იტალიური სერიალი ჩემი არაჩვეულებრივი მეგობარი (My Brilliant Friend) დასკვნითი სეზონით მაყურებელთან შესახვედრად ემზადება. მწერალ ელენა ფერანტეს ნეაპოლური რომანების სერიის ეკრანიზაცია მე-4 სეზონით დასრულდება. ეს სეზონი, რომლის პრემიერაც 9 სექტემბერს შედგება, სწორედ ამ ციკლის ბოლო წიგნს, დაკარგული ბავშვის ამბავს, ეფუძნება.

ჩემი არაჩვეულებრივი მეგობრის მე-4 სეზონში კი ახალ სახეებსაც ვიხილავთ. სამსახიობო გუნდს შეუერთდა ალბა რორვაკერი, რომელიც აქამდე მხოლოდ ამბის მთხრობელი იყო. ლილას ამჯერად ირენე მაიორინო განასახიერებს, ნინო სარატორეს როლში კი ფაბრიციო ჯიფუნი გამოჩნდება.

მეოთხე სეზონის ოფიციალური თიზერი ცოტა ხნის წინ გავრცელდა.

ჩემი არაჩვეულებრივი მეგობარი ორი საოცარი ინტელექტის მქონე გოგოს მეგობრობას გვიჩვენებს ბავშვობიდან ხანდაზმულ ასაკამდე. ლილა და ელენა ნეაპოლის ღარიბ უბანში იზრდებიან 1950-იან წლებში, სადაც ყოველი დღე ძალადობით, სექსიზმითა და მიზოგინიითაა სავსე. გოგოების გულწრფელი მეგობრობა პირველად მაშინ განიცდის გარდატეხას, როცა ელენას ოჯახი სწავლის გაგრძელების უფლებას აძლევს დაწყებითი კლასების შემდეგ, ლილას — კი არა. ამის შემდეგ მათი გზა იყოფა და თუმცა კიდევ დიდხანს ინარჩუნებენ ბავშვობის მეგობრების სტატუსს, მათ ურთიერთობაში ფარული ქიშპი და შური იპარება; გმირებს შორის დაძაბულობა კი კიდევ უფრო საინტერესოსა და დრამატულს ხდის სერიალს.

რაც შეეხება ნეაპოლური რომანების ციკლს, იმავე ნეაპოლურ კვარტეტს, წიგნების ეს სერია ერთ-ერთი ყველაზე პოპულარულია მსოფლიოში. სერიის წიგნები 40 ქვეყანაში 10 მილიონზე მეტ ეგზემპლარადაა გაყიდული. ასეთი აღიარების მიუხედავად, ელენა ფერანტე, რომელიც ლიტერატურულ ასპარეზზე 1992 წელს გამოჩნდა ფსევდონიმით, დღემდე იდუმალ ფიგურად რჩება: მწერლის ვინაობა უცნობია, მის შესახებ ინფორმაცია კი — ძალიან მწირი.

ჟურნალმა Time-მა 2016 წელს ელენა ფერანტე მსოფლიოში 100 ყველაზე გავლენიან ადამიანს შორის დაასახელა. ნეაპოლური რომანების პირველი წიგნი, ჩემი არაჩვეულებრივი მეგობარი, The New York Times-მა ახლახან 21-ე საუკუნის საუკეთესო წიგნების ასეულში პირველ ადგილზე დააყენა. ამ ჩამონათვალში მოხვდა სერიის მეოთხე წიგნიც და ასევე ფერანტეს სხვა, დამოუკიდებელი რომანი, მარტოობის დღეები, რომელიც ქართულადაცაა ნათარგმნი.

თუ სერიალებს თვალს აქტიურად ადევნებ, არ დაგავიწყდეს, შემოიხედო ჩვენს ჯგუფშიც – ერთი სერიაც და…