საქართველოში დაკავებულ ჟურნალისტს, აფგან სადიგოვს თბილისის საქალაქო სასამართლომ საექსტრადაციო პატიმრობა შეუფარდა. სადიგოვი, ექსტრადირებაზე საბოლოო გადაწყვეტილების მიღებამდე ციხეში დარჩება.

შსს-ის თქმით, ჟურნალისტი აზერბაიჯანის რესპუბლიკაში მუქარისა და გამოძალვის ფაქტზეა ბრალდებული და დაკავება ექსტრადირების მიზნით მოხდა. სადიგოვის ოჯახი აზერბაიჯანული მხარის ბრალდებას ტყუილს უწოდებს და ამბობს, რომ ქვეყანაში დაბრუნების შემთხვევაში მას სიკვდილი ემუქრება.

შეგახსენებთ, სადიგოვი 18 ივლისს საქართველოდან არ გაუშვეს და აეროპორტში განუცხადეს, რომ ქვეყნის დატოვებას მხოლოდ იმ შემთხვევაში შეძლებდა, თუ ბაქოსკენ აიღებდა გეზს.

ჟურნალისტი აზერბაიჯანში ორჯერ იყო დაკავებული, ჯერ 2016 წელს და შემდეგ 2020 წელს. 2020 წელს შვიდი წლით თავისუფლების აღკვეთა მიუსაჯეს. ამის შემდეგ სადიგოვმა შიმშილობაც დაიწყო. 2021 წელს პატიმრობის ვადა სადიგოვს უზენაესმა სასამართლომ 4 წლამდე შეუმცირა. თითქმის ორწლიანი პატიმრობის შემდეგ ის ამნისტიის საფუძველზე გაათავისუფლეს.

2017 წლის მაისში თბილისიდან გაუჩინარდა აზერბაიჯანის ხელისუფლებისადმი კრიტიკულად განწყობილი ჟურნალისტი აფგან მუხთარლიც, ის მეორე დღეს ბაქოს ციხეში აღმოჩნდა.

საერთაშორისო უფლებადამცველმა ორგანიზაცია Amnesty Inrernational-მა მაშინ თქვა, რომ აზერბაიჯანელი ჟურნალისტი წამებისა და არასათანადო მოპყრობის რისკის ქვეშ იმყოფებოდა. მუხთარლის 2018 წლის იანვარში საზღვრის უკანონო კვეთისა და დიდი რაოდენობით უცხოური ვალუტის გადატანასთვის ექვსწლიანი პატიმრობა მიუსაჯეს. იგი აზერბაიჯანის ციხიდან 2020 წლის მარტში გაათავისუფლეს.

ამავე თემაზე: