სელფების, ვიდეოებისა და ჩვენი ცხოვრების საუკეთესო მომენტების გადაღება ყველას გვიყვარს. მაგრამ ხშირად, ისე ხდება, რომ საყვარელი ან სასაცილო მომენტები სპონტანურად დგება და თუ პერსონალური ფოტოგრაფი არ გყავს, შეუძლებელია ყველაფერი დააფიქსირო.

ფოტოგრაფი ან რეალითი შოუს გადამღები ჯგუფი ძვირიცაა და ნერვების მომშლელიც. მაგრამ მათი ჩანაცვლება უსაყვარლესი რობოტით შეიძლება. ის მთელი დღე თქვენთან ერთად იქნება, გადაიღებს ფოტოებს ვიდეოებს და სმარტფონში ან სხვა მოწყობილობაზე გამოგიგზავნით, თქვენ კი საუკეთესოებს აარჩევთ და ზოგს მეგობრებს გაუზიარებთ, ზოგსაც პირად არქივში შეინახავთ.

ამ ყველაფრის გაკეთება Kuri Vision-ს შეუძლია.

ფოტო: MAYFIELD ROBOTICS

ამერიკული კომპანია Mayfield Robotics-ის ახალი ქმნილება Kuri სახლის რობოტია და მისი სიმაღლე 50 სანტიმეტრია. ის ოთახებში დამოუკიდებლად დასეირნობს, 5-წამიან ვიდეოებს ან ფოტოებს იღებს და საუკეთესო ვარიანტებს მობილურში აგზავნის.

ფოტო: MAYFIELD ROBOTICS

თავდაპირველად, კომპანიის თანამშრომლები Kuri-ს საკუთარ სახლებში ამოწმებდნენ. Mayfield Robotics-ის გენერალური დირექტორის, მაიკ ბიბის თქმით, მათ შეამჩნიეს, რომ რობოტის მიერ გადაღებული ფოტოების ნაწილი სრულიად მოულოდნელი იყო. მაგალითად, ბავშვის ფოტო, რომელიც ცდილობს პატარა თითი რობოტს იმ თვალში ატაკოს, რომელშიც კამერაა განთავსებული.

Kuri-ს მფლობელს რობოტის ჩართვა და გამორთვა დღის ნებისმიერ მონაკვეთში შეუძლია. ასევე იმის მითითება, რომელ ოთახში შეიძლება გადაღება და რომელში არა.

რობოტმა ასევე იცის განსხვავება ადამიანსა და ძაღლს შორის. ის მისი პატრონისგან მიღებული გადაწყვეტილებების საშუალებით იმასაც კი სწავლობს, რა მოგწონს მეტად და რა ნაკლებად. თუ ყოველთვის იწონებთ მის მიერ ბავშვებზე ან ცხოველებზე გადაღებულ ვიდეოებს, Kuri მათ გადაღებას მეტ "ყურადღებას" უთმობს. თუ ვიდეოებს ხშირად შლით, რობოტი ამ მასალით უფრო და უფრო იშვიათად შეგაწუხებთ.

ფოტო: MAYFIELD ROBOTICS

Kuri შეიძლება მთელი დღე სახლში დაფუსფუსებდეს და ვიდეოებსა და ფოტოებს იღებდეს. სრული მასალა რობოტში ინახება, თუმცა თქვენ მხოლოდ 8 საუკეთესო ვარიანტს გიგზავნით. ფაილები cloud-ზე იტვირთება, რომლებზეც წვდომა iOS-ის ან Android-ის აპლიკაციით შეიძლება.

Kuri-სთან ერთად არასდროს მოიწყენთ, რადგან მასთან საუბარიც შეიძლება, რომელიც მარტივად, "ჰეი Kuri"-თ იწყება. მას შეგიძლიათ უთხრათ, რომ ოთახში შევიდეს, ან "სახლში წავიდეს" [Go Home], ამ შემთხვევაში რობოტი დასატენად დამოუკიდებლად მიდის.

რობოტს 2 საათის განმავლობაში უსასრულოდ შეუძლია კუდში გდიოთ, თუმცა შემდეგ 1 საათი დასვენება და ახალი ენერგიით დამუხტვა სჭირდება.

მაიკ ბიბი მოელის, რომ Kuri დამოუკიდებლადაც შეძლებს "სახლში წასვლას", დამუხტვას და დაბრუნებას.

Mayfield Robotics-მა რობოტი უკვე გადასცა რამდენიმე იღბლიან მომხმარებელს, თუმცა დანარჩენებს წლის ბოლომდე მოცდა მოგვიწევს. Kuri-ს ღირებულება $799 იქნება.

რთულია იმის წინასწარმეტყველება, გახდება Kuri ადამიანების ცხოვრების შეუცვლელი მეგზური თუ მომხმარებლებში დისკომფორტს გამოიწვევს. თუმცა ის ალბათ ძალიან პოპულარული იქნება იმ ოჯახებში, სადაც ბავშვები ან შინაური ცხოველები ჰყავთ.