ფორმულა ერთის ყოფილი მრბოლელი რალფ შუმახერი დაქამინგაუთდა და განაცხადა, რომ გეი ურთიერთობაშია. 49 წლის რალფმა, რომელიც შვიდგზის მსოფლიო ჩემპიონის, მიხაელ შუმახერის, უმცროსი ძმაა, ინსტაგრამზე პარტნიორთან ერთად გადაღებული ფოტოც გამოაქვეყნა.

"ყველაზე მშვენიერი ცხოვრებაში ისაა, როცა გვერდით შესაფერისი პარტნიორი გეგულება და მასთან ყველაფრის გაზიარება შეგიძლია", — წერს შუმახერი.

რალფის გარდა, ფორმულა ერთის ერთადერთი ღიად გეი მრბოლელი მაიკ ბატლერი იყო, რომელიც 1988 წელს გარდაიცვალა.

რაც შეეხება შუმახერს, მას გრან-პრი ექვსჯერ აქვს მოგებული. რალფმა 11-წლიანი კარიერა 2007-ში დაასრულა. წინათ იგი დაქორწინებული იყო მოდელ კორა შუმახერზე. წყვილს ერთი საერთო შვილი ჰყავს — 22 წლის დევიდი.

"ძალიან მიხარია, რომ, როგორც იქნა, იპოვე ადამიანი, რომელთანაც თავს კომფორტულად და დაცულად გრძნობ", — მიმართავს დევიდი რალფს ინსტაგრამზე, — "ბოლომდე შენ გვერდით მიგულე, მამა, გილოცავ და ყველაფერს საუკეთესოს გისურვებ".

შუმახერის ქამინგ აუთს ინსტაგრამპოსტით გამოეხმაურა გერმანელი მსახიობი და მრბოლელის ახლო მეგობარი კარმენ გაისიც, რომელმაც წყვილთან ერთად გადაღებული ფოტო გამოაქვეყნა.

"ამ ნაბიჯის გადადგმა მისთვის გათავისუფლებასა და საკუთარი თავის მიღებას ნიშნავს", — წერს გაისი, — "ეს გაბედული გადაწყვეტილება იყო, რომელიც მასში დიდი ხნის განმავლობაში მწიფდებოდა, დღეს კი იგი ამაყი და თავდაჯერებულია. [...] მისი სიმამაცე და გულწრფელობა შთამაგონებელია, მე კი უსაზღვროდ მადლიერი ვარ, რომ რალფი ჩემს ცხოვრებაშია. გზა, რომელიც მან საკუთარი თავის საპოვნელად გაიარა, ამტკიცებს, რომ სიყვარული, მიმღებლობა და სიმართლე ყველაზე ძლიერია".

ასევე იხილეთ: