საერთაშორისო პროექტი "ნიჭიერი", ამიერიდან რუსთავი 2-ის ნაცვლად, იმედის ეთერში გავა. პროექტის პრომო უკვე ჩაშვებულია სატელევიზიო ბადეში.

როგორც On.ge-ის რუსთავი 2-ის გენერალურმა დირექტორმა განუცხადა, პროექტის ლიცენზია მათი ყოფილი მენეჯერების, გიორგი ხაბურზანიასა და დემნა ჯაფარიძის კომპანიას ეკუთვნის და არა რუსთავი 2-ს. საჯარო რეესტრის მიხედვით, გიორგი ხაბურზანია და დემნა ჯაფარიძე ფლობენ კომპანია ნოვა პროდაქშენს, რომელსაც, სავარაუოდ, აქვს "ნიჭიერის" ლიცენზია.

ტელეკომპანია რუსთავი 2-ის პროექტების მენეჯერები, ვინც ამ არხზე "ნიჭიერს" ხელმძღვანელობდნენ, ტელეკომპანია იმედში რამდენიმე კვირის წინ გადავიდნენ. აღნიშნული, On.ge-ს რუსთავი 2-ის გენერალურმა დირექტორმა, ნიკა გვარამიამ, 18 ივლისს დაუდასტურა.

დემნა ჯაფარიძე და გიორგი ხაბურზანია "ნიჭიერის" გარდა, შოუ "X-ფაქტორის" პროდიუსერებიც იყვნენ.

მათი რუსთავი 2-დან გადასვლის შესახებ ინფორმაციის გავრცელებისას, ტელეიმედის გენერალურმა დირექტორმა, გიორგი ბახტაძემ On.ge-ს უთხრა, რომ "ნიჭიერი" და "X ფაქტორი" იმედის ეთერში არ მოხვდებოდა.

"ნიჭიერი" ტელეკომპანია რუსთავი 2-ის ეთერში პირველად 2010 წლის პირველ თებერვალს გავიდა და დღემდე, 7 სეზონი დამზადდა. იგი მსოფლიოში პოპულარული Got Talent ფორმატის ქართული, ლიცენზირებული ვერსიაა.