რა ხდება: მას შემდეგ, რაც პარლამენტმა პრეზიდენტის ვეტო რუსულ კანონზე დაძლია, ოპოზიციონერი დეპუტატები, პარლამენტის წინ, რუსული კანონის საპროტესტო აქციის მონაწილეებს შეუერთდნენ.

  • დეპუტატებმა მოუწოდეს საქართველოს პრეზიდენტს, სალომე ზურაბიშვილს, მივიდეს რუსული კანონის საპროტესტო აქციაზე.

დეტალები: დეპუტატები აცხადებენ, რომ 2024 წლის საპარლამენტო არჩევნებამდე დარჩენილია 151 დღე და თითოეული დღე იქნება მძიმე ბრძოლის:

  • "მოღალატე და ყველაფრის მკადრებელი ხელისუფლების დასამარცხებლად თითოეული ჩვენგანი ვიქნებით ჩვენი ხმის და ჩვენი სამშობლოს დაცვის ჯარისკაცები. დავდოთ პირობა, რომ 2024 წლის არჩევნებში დავამარცხებთ ამ ხელისუფლებას", — განაცხადა ოპოზიციონერმა დეპუტატმა, თამარ კორძაიამ.

კონტექსტი: დღეს, 28 მაისს, საპარლამენტო უმრავლესობამ, პრეზიდენტ სალომე ზურაბიშვილის ვეტო რუსულ კანონზე, დაძლია.

  • პრეზიდენტის მოტივირებულ შენიშვნებს არცერთი მხარდამჭერი არ ჰყავდა, წინააღმდეგი იყო 66 დეპუტატი.
  • კანონის თავდაპირველ ვერსიას მხარი დაუჭირა 84-მა დეპუტატმა, 4-ის წინააღმდეგ.

დღეს, დილიდან, პარლამენტთან შეკრებილები არიან რუსული კანონის საპროტესტო აქციის მონაწილეები.

  • ამ წუთებში, პარლამენტის მიმდებარე ტერიტორიაზე საპოლიციო ძალები არიან მობილიზებული.