მოკლედ: ღიად ანტიდასავლური განცხადებებით გამორჩეული თბილისის მერის, კახა კალაძის თქმით, წარმოუდგენლად მიაჩნია ის ფაქტი, რომ საქართველოს, შესაძლოა, ვიზალიბერალიზაცია შეუჩერდეს.

  • კალაძის შეფასებით, საქართველოს პარტნიორი ქვეყნების მიერ გაკეთებული განცხადებები არის ზეწოლა, შანტაჟი და მსგავსი დამოკიდებულება კატეგორიულად მიუღებელია.

დეტალები: "რატომ უნდა შეუჩერონ ჩვენს ქვეყანას ვიზალიბერალიზაცია? იმისთვის, რომ საქართველოში ქვეყნის აბსოლუტური უმრავლესობის მიერ არჩეული პარლამენტი ქვეყნისთვის საჭირო და მნიშვნელოვან კანონპროექტს იღებს?", — განაცხადა მერმა.

  • მისივე თქმით, საქართველოს მთავრობა მზად არის მეგობრობისთვის, თანამშრომლობისა და ჯანსაღი ურთიერთობებისთვის:"საქართველომ თავისი ქმედითი ნაბიჯებით დაამტკიცა, რომ არის სანდო პარტნიორი ქვეყანა".

მსგავსი: POLITICO: კონგრესში შედის კანონპროექტი, რომლის მიხედვით, რუსული კანონის მიღებაზე პასუხისმგებელ პირებს დაეკისრებათ სანქციები

კონტექსტი: დღეს, 22 მაისს, გამოცემა Financial Times საკუთარ წყაროებზე დაყრდნობით გაავრცელა ინფორმაცია, რომ ევროკავშირის ოთხი ქვეყანა ითხოვს საქართველოს წინააღმდეგ სანქციების დაწესებას, მათ შორის, ბლოკთან უვიზო მიმოსვლის შეჩერებას, თუ პარლამენტი რუსულ კანონს მიიღებს.

  • გამოცემა წერს, რომ ესტონეთი, ნიდერლანდები, ჩეხეთი და შვედეთი გამოვიდნენ ინიციატივით, ევროკავშირმა, მომდევნო კვირას, საგარეო საქმეთა მინისტრების შეხვედრაზე შემზღუდავი ზომები განიხილოს.
  • ეს ზომები მოიცავს საქართველოს მოქალაქეებისთვის ევროკავშირში უვიზო მიმოსვლის გაუქმებას, მიზნობრივ სანქციებს და ევროკავშირის სახსრების გაყინვას.

გაიგე მეტი: თუ საქართველოს ანტიდემოკრატიული კურსი შეიცვლება, აშშ განიხილავს ვიზალიბერალიზაციას, მნიშვნელოვან სამხედრო და სავაჭრო დახმარებას