მოკლედ: ამ წუთებში, საქართველოს პარლამენტთან, რუსული კანონის საპროტესტო აქციაზე იმყოფებიან ევროკავშირის რამდენიმე წევრი ქვეყნის პარლამენტის საგარეო საქმეთა კომიტეტების თავმჯდომარეები. მათ შორის:

  • მიხაელ როთი — გერმანიის პარლამენტის საგარეო საქმეთა კომიტეტის თავმჯდომარე და ჟიგიმანტას პავილიონისი — ლიეტუვის პარლამენტის საგარეო ურთიერთობათა კომიტეტის თავმჯდომარე.

მიხაელ როთმა, რომელიც თბილისში გუშინ, 13 მაისს ჩამოვიდა, საპროტესტო აქციის მონაწილეებს სიტყვით მიმართა:

  • "თბილისი ნამდვილად არის ევროპის ნამდვილი დედაქალაქი და ჩვენ თქვენით ვამაყობთ. თქვენი ბრძოლა ჩვენი ბრძოლაა. გთხოვთ, ძვირფასო ქართველებო, უსმინეთ ახალგაზრდა თაობას, თქვენს შვილებს. თქვენ იბრძვით იმისთვის, რასაც ევროპა ჰქვია, თავისუფლება, დემოკრატია, კანონის უზენაესობა".

დეტალები: მეორე დღეა, რაც გერმანიის, პოლონეთის, ჩეხეთისა და ლიეტუვის საგარეო ურთიერთობათა კომიტეტის თავმჯდომარეები თბილისში იმყოფებიან.

  • ისინი შეხვდნენ საქართველოს პრეზიდენტს, სალომე ზურაბიშვილს, სამოქალაქო სექტორის წარმომადგენლებსა და ოპოზიციას, თუმცა, ხელისუფლების ოფიციალური პირები მათთან შეხვედრაზე უარს ამბობენ.

გაიგე მეტი: "ქართული კოშმარი" საქართველოს ევროინტეგრაციის შანსებს აკარგვინებს — ამბობენ დასავლელი დიპლომატები, რომლებსაც ხელისუფლება არ შეხვდა

კონტექსტი: საქართველოს პარლამენტთან საპროტესტო აქცია, ფაქტობრივად, მთელი დღის განმავლობაში, უწყვეტად მიმდინარეობს.

  • დღეს, 14 მაისს, საქართველოს პარლამენტმა რუსული კანონი მესამე, საბოლოო მოსმენით მიიღო.
  • რუსული კანონის საბოლოოდ მიღების შემდეგ, ხელისუფლებამ სპეცრაზმის გამოყენებით, პარლამენტის მიმდებარე ტერიტორია, მათ შორის, რუსთაველის გამზირის ნაწილი, აქციის მონაწილეებისგან ძალის გამოყენებით გაწმინდა.
  • გამოიყენეს წიწაკის სპრეიც.

გაიგე მეტი: მოვუწოდებთ სპეციალური დანიშნულების რაზმის თანამშრომლებს, არ შეასრულონ უკანონო ბრძანებები — საია