რა ხდება: 8 მაისის ღამეს, რუსული კანონის მოწინააღმდეგეებზე თავდასხმის შემდეგ, სამოქალაქო საზოგადოების ორგანიზაციებმა ბრიფინგი გამართეს და განაცხადეს, რომ ყველა დაზარალებულს სამართლებრივ დახმარებას გაუწევენ:

• "აქტიურ მოქალაქეებზე მიზანმიმართული თავდასხმის თითოეულ შემთხვევას წინა კვირებში გამართულ აქციებსა თუ ახლა, აუცილებლად ბოლომდე მივყვებით".

ორგანიზაციების საერთო განცხადება: "8 მაისს ღამე ხელისუფლებას ნერვებმა საბოლოოდ უმტყუნა და ნაადრევად დაიწყო იმის ჩვენება, თუ როგორ ქვეყნად აპირებენ საქართველოს ქცევას. ბიძინა ივანიშვილის მიერ 29 აპრილს დაანონსებული საგარეო ვექტორის ცვლილება და რეპრესიები უკვე თვალსაჩინოდ ამოქმედდა.

• ასობით მოქალაქესთან განხორციელებული მუქარისა და შეურაცხყოფის ზარები, პოლიტიკოსებსა და აქტივისტებზე ფიზიკურ თავდასხმებსა და ორგანიზებულ ანგარიშსწორებაში გადაიზარდა.
• ოლიგარქსა და მის მარიონეტებს ავიწყდებათ, რომ საქართველო არ არის რუსეთი. ქართველებმა ვიცით თავისუფლების ფასი. ქვეყნის ევროპული მომავლისთვის ჩვენ ბრძოლას რუსული უშიშროების სამსახურის მეთოდებით ვერაფერს დააკლებენ.
• ადამიანზე მიპარვით ზურგიდან თავდასხმას, სადარბაზოებში დევნას ან მცირეწლოვანი ბავშვისთვის კარის შემტვრევის მცდელობას ქართველი არასდროს მოიწონებს, ასე იქცევა რუსული რეჟიმი.
• ჩვენ სამართლებრივ დახმარებას გავუწევთ ყველა დაზარალებულს. აქტიურ მოქალაქეებზე მიზანმიმართული თავდასხმის თითოეულ შემთხვევას წინა კვირებში გამართულ აქციებსა თუ ახლა, აუცილებლად ბოლომდე მივყვებით. მოვითხოვთ და უზრუნველვყოფთ დამნაშავეთა გამოვლენას.
• თავისუფლება ქართველი ხალხის მთავარი ღირებულებაა, ამიტომ ვდგავართ და ვიდგებით საქართველოს ევროპული მომავლის სადარაჯოზე, რუსული მეთოდებისა და ძალადობისაგან ამ ქვეყნის დასაცავად. ამ ბრძოლას ქართველი ხალხი გამარჯვებით დაასრულებს, მოძალადეებს კი სათანადო პასუხი აუცილებლად მიეზღვებათ".

კონტექსტი: წუხელ, ფიზიკურად გაუსწორდნენ რუსული კანონის სამ მოწინააღმდეგეს — გია ჯაფარიძეს, ლაშა ღვინიანიძეს და დიმიტრი ჩიქოვანს.

• ასევე, პარტია ახალის წევრმა, გიორგი ონიანმა განაცხადა, რომ უცნობი პირები სახლში მიუვარდნენ, სადაც მისი 14 წლის შვილი მარტო იმყოფებოდა.

დღეს, 9 მაისს, ცნობილი გახდა, რომ შინაგან საქმეთა სამინისტრომ, 8-9 მაისს, პარლამენტის მიმდებარედ გამართული საპროტესტო აქციების 6 მონაწილე დააკავა.

• დაკავებულებს პოლიციელზე თავდასხმისა და ნივთის დაზიანება ედებათ ბრალად.
• რუსული კანონის მოწინააღმდეგეებზე თავდასხმას გამოეხმაურა სახალხო დამცველიც და სამართალდამცავებს მყისიერი რეაგირებისკენ მოუწოდა.

გარდა ამისა, ბოლო დღეების განმავლობაში, აქტივისტებისა და კანონის მოწინააღმდეგეების ტელეფონებზე არაერთი ზარი დაფიქსირდა, უმეტესად, უკრაინასა და სხვა ქვეყნებიდან.

• უცნობი პირები სიტყვიერ შეურაცხყოფას აყენებენ ადრესატებს და ემუქრებიან.
• გუშინ, 8 მაისს, ჟურნალისტური რესურსცენტრის ხელმძღვანელმა ნათია კუპრაშვილმა დაწერა, რომ სამი უცხო ქვეყნიდან შემომავალი ზარის შემდეგ, მას ქართული ნომრიდანაც დაურეკეს.