შინაგან საქმეთა სამინისტროს ძველი თბილისის პოლიციის განყოფილებაში ევროპული საქართველოს წევრს, ოთარ კახიძეს სამართალდარღვევათა ოქმი შეუდგინეს. კახიძის სანქცირების საკითხზე გადაწყვეტილება თბილისის საქალაქო სასამართლომ უნდა მიიღოს. საქმე ეხება რუსული ფაშიზმის წინააღმდეგ აქციაზე კახიძის იარაღით მისვლას.

აღნიშნულ საქმეზე სამართალწარმოება ადმინისტრაციულ სამართალდარღვევათა კოდექსის 174-ე პრიმა მუხლით (შეკრების ან მანიფესტაციის ორგანიზებისა და ჩატარების წესის დარღვევა) დაიწყო. ამავე კოდექსის მიხედვით, ამ დარღვევისთვის ოქმს შსს ადგენს (239-ე მუხლი).

ადმინისტრაციულ სამართალდარღვევათა კოდექსის 174-ე პრიმა მუხლის მიხედვით:

  1. შეკრების ან მანიფესტაციის ორგანიზებისა და ჩატარების წესის დარღვევა ისჯება სანქციით 500 ლარის ოდენობით;
  2. იგივე ქმედება, ჩადენილი შეკრების ან მანიფესტაციის ორგანიზატორის მიერ ისჯება სანქციით 5 ათასი ლარის ოდენობით.

On.ge შსს-ს პრესსამსახურიდან ელოდება პასუხს, რომელი პუნქტის მიხედვით შეადგინეს კახიძის სამართალდარღვევათა აქტი.

23 ივლისს გამართული აქციის დროს ოთარ კახიძის მიერ იარაღის ტარების შემთხვევა პალიტრანიუსის ჟურნალისტებმა გადაიღეს. საქართველოს ახალგაზრდა იურისტთა ასოციაციის იურისტი, გიორგი გოცირიძე ამბობს, რომ საქართველოს კანონმდებლობით აკრძალულია მანიფესტაციის დროს ცეცხლსასროლი იარაღის ტარება. თუმცა განმარტავს:

"როდესაც არამასობრივად ატარებენ იარაღს და ის არ არის აქციის დაშლის მიზეზი, მსგავსი დარღვევა აქცია უკანონოდ ვერ აქცევდა და არ არის პასუხისმგებლობის საფუძველი. დარღვევა უნდა აღმოეჩინა ადგილობრივი თვითმმართველობის უფლებამოსილ პირს და გაფრთხილება მიეცა აქციის ორგანიზატორისთვის დარღვევის აღმოსაფხვრელად".