რა ხდება: 425 მომხრე - 25 წინააღმდეგი, ევროპარლამენტმა მიიღო რეზოლუცია საქართველოში უცხოეთის გავლენის გამჭვირვალობის კანონპროექტთან დაკავშირებით.

დეტალები: სრულ ტექსტთან ერთად, რომელშიც ნათქვამია, რომ ევროკავშირში გაწევრიანების მოლაპარაკებები საქართველოსთან არ უნდა გაიხსნას მანამ, სანამ ეს კანონი საქართველოს სამართლებრივი წესრიგის ნაწილია, ევროპარლამენტმა მხარი დაუჭირა 2 შესწორებასაც, რომელიც ეხება ბიძინა ივანიშვილის სანქცირებას და სააკაშვილის გათავისუფლების მოთხოვნას.

შესწორებები დარეგისტრირებული ჰქონდათ "ევროპელ კონსერვატორებს და რეფორმისტებს" და, ასევე, "განახლებას".

შესწორებები შემდეგ პუნქტებს მოიცავს:

  • დაუწესდეს სანქციები ბიძინა ივანიშვილს, რომელიც "ცდილობს, ძირი გამოუთხაროს ქვეყნის დასავლურ კურსს რუსეთისკენ გადახრის სასარგებლოდ“. ასევე, წერენ, რომ ივანიშვილი საკუთარი ხალხის ინტერესების წინააღმდეგ მოქმედებს";
  • ევროპარლამენტი კიდევ ერთხელ მოუწოდებს საქართველოს ხელისუფლებას, პატიმრობიდან გაათავისუფლონ ექსპრეზიდენტი მიხეილ სააკაშვილი და მისცენ მას საზღვარგარეთ მკურნალობის საშუალება.
  • ევროპარლამენტი მოუწოდებს ევროკომისიას, შეაფასოს კანონის გავლენა საქართველოს მიერ ვიზალიბერალიზაციის კრიტერიუმების შესრულებაზე, განსაკუთრებით, ფუნდამენტური უფლებების ნაწილში. აღნიშნავენ, რომ ეს ევროკავშირთან სავიზო ლიბერალიზაციის პოლიტიკის უმნიშვნელოვანესი კომპონენტია.
  • ასევე, ევროპარლამენტი მოუწოდებს ქართულ ოცნებას, გაიწვიოს საკონსტიტუციო ცვლილებების სახით ინიციირებული პროექტი, რომელიც ზღუდავს ლგბტიქ უფლებებს და არის თავდასხმა არამხოლოდ ამ თემზე, არამედ, სიტყვის თავისუფლებასა და თავისუფალ სამოქალაქო საზოგადოებაზე.

ნახეთ რეზოლუციის სრული ტექსტი: მოლაპარაკებები არ დაიწყება, ვიდრე ეს კანონი დღის წესრიგშია — ევროპარლამენტის რეზოლუციის საბოლოო პროექტი