რა ხდება: საქართველოში შექმნილი მდგომარეობის შესახებ, დღეს, შესაძლოა, ევროკავშირის სამიტზე იმსჯელონ.

  • ამის შესახებ წერს რადიო თავისუფლების ევროპული ბიუროს ხელმძღვანელი, რიკარდ იოზვიაკი.

დეტალები: "ევროკავშირის ზოგიერთმა ლიდერმა, შესაძლოა, საქართველოში არსებული ვითარება, ამ საღამოს, ევროკავშირის სამიტზე დააყენოს, იმის მიუხედავად, რომ ოფიციალურად ეს საკითხი დღის წესრიგში არ არის.

  • უფრო მეტად მოსალოდნელია, რომ ევროკავშირის საგარეო მინისტრებმა ამის შესახებ ორშაბათს იმსჯელონ", — წერს იოზვიაკი.

კონტექსტი: გუშინ, დღის ბოლოს, საქართველოს პრეზიდენტის ადმინისტრაციამ გაავრცელა ინფორმაცია, რომ სალომე ზურაბიშვილმა მიმართა ევროპული საბჭოს პრეზიდენტს, შარლ მიშელს და საფრანგეთის პრეზიდენტს, ემანუელ მაკრონს, საქართველოში განვითარებული მოვლენები ევროპული საბჭოს დღეს დაგეგმილ სხდომაზე განიხილონ.

  • ადმინისტრაციის ინფორმაციით, ეს საკითხი სხდომის დღის წესრიგში შეტანილი არ არის.

ბოლო ხაზი: რუსული კანონი საპარლამენტო უმრავლესობამ დღეს პირველი მოსმენით მიიღო.

  • პარლამენტის მიმდებარე ტერიტორიაზე უკვე მესამე დღეა, საპროტესტო აქციები იმართება.