მოკლედ: საქართველოს სახალხო დამცველი ლევან იოსელიანი აცხადებს, რომ თუ ვინმეს აინტერესებს, როგორ ფინანსდება კონკრეტული არასამთავრობო ორგანიზაცია, შესაძლებელია, ქვეყანაში არსებულ გრანტის კანონს მუხლი დაემატოს.

  • "გვაქვს გრანტის კანონი, სადაც შესაძლებელია დაემატოს ერთი მუხლი, რომელიც უზრუნველყოფს ამ მიზნის მიღწევას", — თქვა იოსელიანმა გუშინ, 5 აპრილს, ტვ პირველის გადაცემა პოლიტიკურ ამბებში.

დეტალები: იოსელიანის აცხადებს, რომ თუ კანონი წინააღმდეგობაში მოდის საქართველოს სტრატეგიული პარტნიორების დამოკიდებულებებთან და ქვეყნის შემდგომ ნაბიჯებთან ევროინტეგრაციის გზაზე, "საკითხი უნდა გადაიხედოს".

  • იოსელიანი აღნიშნავს, რომ 2023 წელს რუსული კანონი "იარლიყების მიმკერებელი" და ადამიანებისთვის შეურაცხმყოფელი იყო:
  • "ზოგადად პრინციპია, ადამიანის ღირსებას არ უნდა შეურაცხყოფდეს არანაირი კანონი, არც თავისი სახელწოდებით, არც შინაარსით.
  • ამავე დროს, მაინც ხაზს ვუსვამ, რომ გამჭვირვალობა არის ლეგიტიმური მიზანი და ამის განხორციელებაში მე ვერანაირ პრობლემას ვერ ვხედავ, ოღონდ ეს მიზნები მიღწეული იქნას ასევე ისეთი ფორმით, რა ფორმაც მისაღებია ჩვენი პარტნიორებისთვის", — განაცხადა ლევან იოსელიანმა.

სახალხო დამცველმა თქვა, რომ თუ რუსული კანონი საქართველოს კონსტიტუციასთან წინააღმდეგობაში იქნება, მას საკონსტიტუციო სასამართლოში გაასაჩივრებს:

  • "მე არ ვიცი საბოლოოდ რა ფორმით იქნება მიღებული, თუ მოვა საქართველოს კონსტიტუციასთან წინააღმდეგობაში, რა თქმა უნდა, ეს ჩვენი ვალდებულებაა, რომ ეს [გასაჩივრება] ჩვენ გავაკეთოთ".

კონტექსტი: 3 აპრილს, ქართული ოცნების აღმასრულებელმა თავმჯდომარემ და უმრავლესობის ლიდერმა, მამუკა მდინარაძემ, განაცხადა, რომ ოცნება ისევ აპირებს, "უცხო აგენტად" გამოაცხადოს დამოუკიდებელი მედიასაშუალებები, რომელთა შემოსავლის 20%-ზე მეტის წყარო "უცხოური ძალაა", ანუ საგრანტო პროექტებია.

  • მდინარაძის თქმით, "კანონპროექტი საქართველოს პარლამენტში დაინიცირდება ზუსტად იმავე ტექსტით, როგორც შარშან იყო".

გასული, 2023 წლის მარტში ანალოგიური კანონპროექტის ინიციირებას საზოგადოება პარლამენტის წინ აპროტესტებდა, სამართალდამცავებმა კი ისინი რამდენჯერმე დაშალეს წყლის ჭავლის, წიწაკის სპრეისა და ცრემლსადენი გაზის გამოყენებით.

  • შემდეგ, მძლავრი საზოგადოებრივი წინააღმდეგობის ფაქტორის გამო, მმართველმა პარტიამ კანონპროექტი ჩააგდო.

რედაქციისგან: რატომ არის ქართული ოცნების კანონი რუსული — მოკლედ და მარტივად