მოკლედ: საქართველოს ყოფილმა პრემიერ-მინისტრმა და ახლა უკვე პარტია ქართული ოცნების თავმჯდომარემ, ირაკლი ღარიბაშვილმა, 2023 წელს მშობლებისგან საჩუქრად 150 000 ლარი მიიღო, ისევე როგორც

• 2022 წელს — 180 000 ლარი;
• 2021 წელს — 150 000 ლარი;
• და 2020 წელს — 150 000 ლარი.
• ჯამში, დეკლარაციების თანახმად, ღარიბაშვილს, ბოლო ოთხ წელიწადში, პენსიონერმა მშობლებმა 630 000 ლარი აჩუქეს.

რა მოხდა: 2024 წლის 23 მარტს, ირაკლი ღარიბაშვილმა ქონებრივი დეკლარაცია განაახლა. დეკლარაციის მიხედვით,

• 2023 წელს ირაკლი ღარიბაშვილის, როგორც პრემიერ-მინისტრის, წლიური ხელფასი 45 104 ლარი იყო, ხოლო ფულადი დანაზოგი 50 000 ლარი.
• ღარიბაშვილმა ოჯახური მოგზაურობისთვის 20 000 დოლარი დახარჯა, ხოლო ოჯახური წვეულებისთვის 15 000 ლარი გადაიხადა.
• 2023 წელს ირაკლი ღარიბაშვილის შვილის, ანდრია ღარიბაშვილის სწავლის საფასური 24 091 ლარი იყო, გაბრიელ ღარიბაშვილის 13 372 ლარი, ხოლო ნინო ღარიბაშვილის — 5 445 ლარი.

გარდა ამისა, ირაკლი ღარიბაშვილის შვილის ამერიკის შეერთებულ შტატებში გადაფრენა 109 000 ლარი დაჯდა. დეკლარაციის მიხედვით, თბილისი-მიუნხენი-თბილისის საჰაერო რეისის ხარჯის გადახდა მოხდა 2 ეტაპად: 94 500 ლარი და 15 000 ლარი.

სტრიქონებს შორის: 2023 წლის სექტემბერში, ტვ პირველზე გავიდა ნოდარ მელაძის შაბათის საგამოძიებო სიუჟეტი, საიდანაც ცნობილი გახდა, რომ ღარიბაშვილმა, აშშ-ში შვილთან ერთად პირადი ფრენისთვის სამთავრობო თვითმფრინავი გამოიყენა. ამას მოჰყვა მთავრობის სტრატკომის განმარტება, რომ ამისთვის პრემიერ-მინისტრს საბიუჯეტო თანხები არ გამოუყენებია. სტრატკომის განცხადებამ გააჩინა კითხვა: როგორ შეუძლია ღარიბაშვილს, დაახლოებით, 100 000 ლარის გადაიხადოს აშშ-ში პირადი ფრენისთვის, როდესაც მისი დეკლარირებული შემოსავლების მიხედვით, მისი 2022 წელს წლიური შემოსავალი 41 000 ლარი იყო.

რა ქონებას ფლობს ირაკლი ღარიბაშვილი: მას სამი ბინა აქვს, ასევე, ავტომობილი, ავტოფარეხი და არასაცხოვრებელი ფართი თბილისში.

• 2019 წელს ნაყიდი, იმავე წელს გამოშვებული ავტომობილი — აუდი A8. ამისთვის ღარიბაშვილმა 75 620 ევრო დახარჯა. დეკლარაციაში მიუთითებს, რომ აუდი განვადებით იყიდა.
• 2009 წელს, 100 000 ლარად ნაყიდ ბინასა და 10 000 ლარად ნაყიდ ავტოფარეხს ფლობს გაგარინის ქუჩაზე;
• 2011 წელს, ორი ბინა იყიდა მოსაშვილის ქუჩაზე. აქედან ერთის ღირებულება იყო 185 000 ლარი, მეორე ბინის ფასი დეკლარაციაში არ მიუთითებია.
• 2011 წელსვე, 6 711 ლარად ნაყიდი აქვს არასაცხოვრებელი ფართი ასევე, მოსაშვილზე.
• 221 000 ლარი აქვს მითითებული გრაფაში — საქართველოში ან სხვა ქვეყანაში თქვენი ან ოჯახის წევრის საკუთრებაში არსებული უძრავი ქონება.

ბოლო ხაზი: 2024 წლის 22 იანვარს, ორგანიზაციამ საერთაშორისო გამჭვირვალობა — საქართველო გამოაქვეყნა თანამდებობის პირთა 300 მაღალჩინოსნის სია, რომელთა ქონებრივი დეკლარაცია, მაღალი საზოგადოებრივი ინტერესიდან და კორუფციის მაღალი რისკიდან გამომდინარე, უნდა შემოწმდეს. სიაში არიან როგორც ირაკლი ღარიბაშვილი, ასევე, მთავრობის სხვა მაღალჩინოსნები. მეტი