BBC Shows-ის მიერ ახლახან გავრცელებული ინფორმაციით, გიორგი გიგაშვილი BBC-ის სიმფონიურ ორკესტრთან ერთად დაუკრავს. BBC-ის სიმფონიური ორკესტრის კონცერტი ლონდონში 16 აპრილს ჩატარდება.

სიმფონიური ორკესტრის დირიჟორი ნილ ვენდიტი იქნება, კონცერტზე კი იტალიელი კომპოზიტორების, ჯაკომო პუჩინისა და ალფრედო კაზელას, ნაწარმოებები შესრულდება. გიორგი გიგაშვილი ორკესტრთან ერთად მოცარტის საფორტეპიანო კონცერტ No. 2 K. 39-ს შეასრულებს.

შეგახსენებთ, რომ გასულ წელს ქართველი პიანისტი გიორგი გიგაშვილი BBC-ის New Generation Artists-ის 2-წლიან პროგრამაში მოხვდა. პროგრამაში მონაწილეობა გულისხმობს დიდ ბრიტანეთში კონცერტებს, ფესტივალებსა და ალბომების ჩაწერას ისეთ პრესტიჟულ ორკესტრებთან, როგორებიც BBC Philharmonic და BBC-ის სიმფონიური ორკესტრი არიან.

New Generation Artists პროგრამა 1999 წელს შეიქმნა, მისი მიზანი კი ახალგაზრდა ხელოვანების მხარდაჭერა და მათი ფართო აუდიტორიისთვის გაცნობაა. პროგრამისთვის მსოფლიოს მასშტაბით საუკეთესო პოტენციალის მქონე ხელოვანებს არჩევენ და მათ შორის უკვე ქართველი პიანისტიცაა. პროგრამის ფარგლებში გიორგი და სხვა მონაწილეები სხვადასხვა ფესტივალებთან და ხმის ჩამწერ სტუდიებთან ითანამშრომლებენ და დიდ ბრიტანეთში კონცერტებსაც გამართავენ.