მოკლედ: საქართველოს საგარეო საქმეთა სამინისტრო გმობს საქართველოს ოკუპირებულ რეგიონებში რუსეთის საპრეზიდენტო არჩევნების ჩატარებას და საარჩევნო უბნების უკანონოდ გახსნას.

  • განცხადება საგარეო უწყებამ გაავრცელა.

დეტალები: სამინისტრო მიიჩნევს, რომ რუსეთის ეს ქმედება არის საქართველოს სუვერენიტეტისა და ტერიტორიული მთლიანობის წინააღმდეგ მიმართული ნაბიჯი, რომელიც უხეშად არღვევს საერთაშორისო სამართლის ფუნდამენტურ პრინციპებსა და ნორმებს.

"ოკუპირებულ რეგიონებში ნებისმიერი არჩევნების ჩატარება უკანონოა ოკუპაციის ფონზე, რაც დადგენილია მათ შორის საერთაშორისო სასამართლოებით, და იმ პირობებში, როცა ოკუპირებული ტერიტორიებიდან ეთნიკური წმენდის შედეგად გამოდევნილ მოსახლეობას კვლავ არ ეძლევა საკუთარ სახლში დაბრუნების შესაძლებლობა", — წერია განცხადებაში.

ასევე, ნახეთ: 2030 წლამდე რუსეთს კვლავ პუტინი მართავს — დათვლილია ხმების 99.7 პროცენტი

  • საქართველოს საგარეო საქმეთა სამინისტრო მოუწოდებს რუსეთს, შეწყვიტოს საქართველოს სუვერენიტეტისა და ტერიტორიული მთლიანობის წინააღმდეგ მიმართული ქმედებები და შეასრულოს თავისი საერთაშორისო ვალდებულებები, მათ შორის ევროკავშირის შუამავლობით დადებული 2008 წლის 12 აგვისტოს ცეცხლის შეწყვეტის შეთანხმება.
  • ამასთან, საგარეო მიმართავს საერთაშორისო თანამეგობრობას, სათანადო შეფასება მისცეს და რეაგირება მოახდინოს ოკუპირებულ რეგიონებში რუსეთის მორიგ უკანონო ქმედებებზე.

მსგავსი: ბჟანია აფხაზებს მოუწოდებს, ხმა მისცენ პუტინს

ბოლო ხაზი: რუსეთის საპრეზიდენტო არჩევნებისთვის კენჭისყრა 15-დან 17 მარტამდე, 3 დღის განმავლობაში მიმდინარეობდა.