მოკლედ: 15-17 მარტს რუსეთში საპრეზიდენტო არჩევნები იმართება. რუსული მედია იუწყება, რომ რუსეთის საპრეზიდენტო არჩევნების კენჭისყრის პროცესის დამკვირვებლები საქართველოდანაც ჩავიდნენ.

  • ოკუპანტი ქვეყნის არჩევნების დამკვირვებელთა ჯგუფშია: დიმიტრი ლორთქიფანიძე, პრიმაკოვის სახელობის ქართულ-რუსული ფონდის დირექტორი.
  • მიხეილ ჟღენტი — ორგანიზაცია სოლიდარობა მშვიდობისთვის წარმომადგენელი;
  • თეიმურაზ მაისურაძე — სახელმწიფო ტექნიკური უნივერსიტეტის ბუნებრივი კატასტროფების სამეცნიერო ცენტრის დირექტორი;
  • და ვასო კაპანაძე — ანალიტიკური ცენტრი ექსპერტ პლუსი.

დეტალები: "დღეს ჩვენ მოვინახულეთ რამდენიმე საარჩევნო უბანი, მათ შორის ჩრდილო-აღმოსავლეთის №3453 საარჩევნო ოლქში, სადაც დილის საათებში მაღალი აქტივობა დაფიქსირდა. არჩევნები მშვიდ ვითარებაში მიმდინარეობს", — რუსული პროპაგანდისტული მედიის თანახმად, ამის შესახებ ადგილობრივ მედიას დიმიტრი ლორთქიფანიძემ განუცხადა.

  • რა ვიცით საარჩევნო პროცესზე: საპრეზიდენტო არჩევნების 3-დღიანი კენჭისყრის პირველი დღის შემდეგ, რადიო თავისუფლების კავკასიის ბიუროს თანახმად, სამხრეთ რუსეთისა და ჩრდილოეთ კავკასიის რეგიონებში არჩევნები დარღვევებით ჩატარდა და არაერთი ინციდენტი დაფიქსირდა საარჩევნო უბნებზე;
  • ამომრჩეველთა აქტივობამ მნიშვნელოვნად გადაარჭარბა რუსეთის საშუალო მაჩვენებელს, მაგალითად, ჩეჩნეთში, სადაც აქტივობა თითქმის ორმაგია — წერს გამოცემა.
  • მედია ერთ-ერთი ყველაზე ხშირი დარღვევის ფაქტად ასახელებს საარჩევნო უბნებზე განთავსებულ პუტინის პორტრეტებს.
პუტინის პორტრეტი საარჩევნო უბანზე, დაღესტნის დერბენტის რეგიონში,

პუტინის პორტრეტი საარჩევნო უბანზე, დაღესტნის დერბენტის რეგიონში,

ფოტო: ადმინისტრაციის ტელეგრამის არხი

  • საარჩევნო უბნებზე პორტრეტები ეკიდა დაღესტნის დერბენტის რეგიონში, იზბერბაშში, სულ მცირე, ხუთ რაიონში ვოლგოგრადის რეგიონში, კრასნოდარის მხარეში.

ბოლო ხაზი: საპრეზიდენტო არჩევნების კენჭისყრის შედეგად, ეჭვგარეშეა, რომ ვლადიმირ პუტინი ხელისუფლებაში ყოფნას კიდევ 6 წლით გაახანგრძლივებს.

  • კენჭისყრა სამი დღის განმავლობაში გაგრძელდება.
  • საარჩევნო უბნები კამჩატკის ნახევარკუნძულზე, რუსეთის უკიდურესი აღმოსავლეთით მდებარე რეგიონში 15 მარტს, ადგილობრივი დროით 08:00 საათზე გაიხსნა და საბოლოოდ, დაიხურება უკიდურესი დასავლეთით მდებარე კალინინგრადის ანკლავში კვირას, 20:00 საათზე.

გაიგე მეტი: რა უნდა ვიცოდეთ მიმდინარე საპრეზიდენტო არჩევნებზე რუსეთში