ინდონეზიურ ავიაკომპანია Batik Air-ის ორ პილოტს ფრენისას ჩაეძინა. ინდონეზიის ტრანსპორტის სამინისტრო ამ საკითხთან დაკავშირებით გამოძიების დაწყებას გეგმავს.

სატრანსპორტო უსაფრთხოების ეროვნული კომიტეტის განცხადებით, 25 იანვრის რეისზე ინდონეზიის დედაქალაქ ჯაკარტასკენ 28 წუთის განმავლობაში ორივე პილოტს ერთდროულად ეძინა, რის გამოც თვითმფრინავმა მარშრუტს გადაუხვია.

განცხადებაში ისიცაა ნახსენები, რომ ფრენისას არც თვითმფრინავი და არც შიგნით მყოფი 153 მგზავრი არ დაშავებულა, საბოლოოდ კი, რეისი წარმატებულად განხორციელდა და დედაქალაქში დაეშვა.

როგორც განცხადებაში წერია, ფრენამდე პილოტის თანაშემწემ მთავარი პილოტი გააფრთხილა, რომ "სათანადოდ დასვენებული არ იყო" და რეისამდე მხოლოდ 30 წუთით წაუძინა, გზაში, როდესაც მთავარი პილოტი შესვენებაზე დასაძინებლად გავიდა და მართვა მისმა თანაშემწემ გადაიბარა, ფრენისას მასაც ჩაეძინა. დაახლოებით ნახევარ საათში მთავარ პილოტს გაეღვიძა და შეამჩნია, რომ თვითმფრინავმა მარშრუტს გადაუხვია, რის შემდეგაც თანაშემწეც გამოაფხიზლა.

"ჩვენ გამოძიების ჩატარებას ვგეგმავთ, რათა ავიაკომპანიების იმ პილოტების დაღლილობის რისკის მენეჯმენტზე ვიზრუნოთ, რომელთაც ფრენა ღამის საათებში უწევთ", — აცხადებს ქვეყნის ტრანსპორტის სამინისტრო.

ასევე, სამინისტრო გეგმავს, რომ ამ შემთხვევასთან დაკავშირებით ფრენის ინსპექტორი გაიგზავნოს, რათა ინციდენტის მიზეზები გაირკვეს და შესაბამისი რეკომენდაციებიც გაიცეს.