მოკლედ: რუსი ოპოზიციონერი პოლიტიკოსის ალექსეი ნავალნის გარდაცვალებიდან მე-9 დღეს, მისი ცოლი იულია ნავალნაია ვიდეომიმართვას ავრცელებს, სადაც პუტინისგან მოითხოვს გადასცენ ქმრის ცხედარი, ყოველგვარი წინაპირობის გარეშე.

  • "შენ [პუტინმა] ის [ალექსეი ნავალნი] ცოცხლად აწამე და ახლა მკვდარზეც აგრძელებ. თქვენ დასცინით გარდაცვლილის ნეშტს. შეუძლებელია უფრო დიდი ეშმაკის წარმოდგენა, თქვენ არღვევთ ყველა კანონს: ადამიანურსაც და ღვთაებრივსაც", — ამბობს იულია ნავალნაია.

დეტალები: იულია ნავალნაიას თქმით, პუტინი ალექსეი ნავალნის ცხედარს "მძევლად ატარებს, დასცინის პოლიტიკოსის დედას" და აიძულებს, შვილის ფარულ დაკრძალვას დათანხმდეს.

  • "რას უპირებთ მის ცხედარს? რამდენად დაბლა დაეცემით, თქვენ მიერ მოკლული კაცის თავზე დაცინვით? შანტაჟი, მუქარა, ულტიმატუმები. ეს სიძულვილიც კი არაა - ეს რაღაც სატანიზმი, წარმართობაა", — განაცხადა იულია ნავალნაიამ.

გაიგე მეტი: ვინ არის იულია ნავალნაია, პუტინის ახალი მტერი

კონტექსტი: გუშინ, 23 თებერვალს, ალექსეი ნავალნის პრესმდივანი კირა იარმიშმა X-ზე დაწერა, რომ რუსეთის სახელმწიფო გამომძიებლებმა ალექსეი ნავალნის დედას ულტიმატუმი წაუყენეს — თუ ლუდმილა ნავალნაია სამი საათის განმავლობაში არ დათანხმდებოდა შვილის საიდუმლოდ დაკრძალვას, პოლიტიკოსს იმ ციხეში დაკრძალავდნენ, სადაც გარდაიცვალა.

  • პრესმდივნის თქმით, ლუდმილა ნავალნაიამ უარი თქვა საგამოძიებო კომიტეტის ამ ულტიმატუმის შესრულებაზე.
  • ალექსეი ნავალნის დედა მოითხოვს, გათვალისწინებულ იქნას კანონით დადგენილი ნორმა, რომლის მიხედვით გარდაცვალების მიზეზის დადგენიდან 2 დღის ვადაში, ცხედარი ოჯახს უნდა გადაეცეს.
  • კირა იარმიში წერს, რომ სამედიცინო დოკუმენტების თანახმად, ეს ორდღიანი ვადა დღეს, 24 თებერვალს იწურება.

ბოლო ხაზი: 2024 წლის 16 თებერვალს რუსეთის ფედერალური სასჯელაღსრულების სამსახურმა გაავრცელა ცნობა, რომ ოპოზიციონერი პოლიტიკოსი, ალექსეი ნავალნი სპეციალური რეჟიმის კოლონიაში გასეირნების შემდეგ გარდაიცვალა.

  • 22 თებერვალს ალექსეი ნავალნის დედამ ლუდმილა ნავალნაიამ განაცხადა, რომ შვილის ცხედარი აჩვენეს, თუმცა დასაკრძალად არ გადასცეს.
  • მისი თქმით, მოთხოვნაა, გარდაცვლილი პოლიტიკოსი ჩუმად დაიკრძალოს, რაზეც ოჯახი უარს ამბობს.