რა ხდება: გერმანიის პარლამენტი კენჭს უყრის ახალ კანონს, რომლის მიხედვით, კანაფის რეკრეაციული გამოყენება ლეგალური იქნება.

დეტალები: დეპუტატების მიერ კანონის მხარდაჭერის შემთხვევაში:

• გერმანიაში 18 წელზე მეტი ასაკის მოქალაქეები მიიღებენ კანაფის გარკვეული ოდენობის ფლობის უფლებას, მაგრამ მკაცრი წესები იმოქმედებს ნარკოტიკის შეძენაზე.
• ბევრ საჯარო სივრცეში კანაფის მოწევა კანონიერი გახდება 1 აპრილიდან. სახლის გარეთ ნებადართული იქნება 25 გრამამდე კანაფის ფლობა, საკუთარ სახლებში კი მოქალაქეებისთვის ლიმიტი 50 გრამი იქნება.

გერმანიის ზოგიერთ ნაწილში, მაგალითად, ბერლინში, პოლიცია ხშირად ხუჭავს თვალს საჯარო სივრცეში მოწევაზე, თუმცა ნარკოტიკის რეკრეაციული გამოყენებისთვის ქონა უკანონოა და ასეთ ფაქტებზე, შესაძლოა, სისხლისსამართლებრივი დევნა დაიწყოს.

ნარკოტიკების მოხმარების მაჩვენებელი, ახალგაზრდებში წლების განმავლობაში იზრდება, მიუხედავად არსებული კანონისა —ამბობს ჯანდაცვის მინისტრი კარლ ლაუტერბახი. მას სურს, შეასუსტოს შავი ბაზარი, დაიცვას მწეველები საფრთხისშემცველი კანაფისგან და შეუწყვიტოს შემოსავალი ორგანიზებულ დანაშაულებრივ დაჯგუფებებს.

• თუმცა, ლეგალური კანაფის კაფეები ქვეყანაში ერთბაშად არ გაჩნდება. დებატები კანაფის დეკრიმინალიზაციის შესახებ გერმანიაში წლების განმავლობაში მიმდინარეობს, ექიმების ჯგუფები გამოხატავდნენ შეშფოთებას, რომ ლიბერალიზაცია ხელს შეუწყობს ნარკოტიკების მოხმარების გაზრდას.

კანაფის მოწევა, ზოგიერთ ადგილას, მაგალითად, სკოლებთან და სპორტულ მოედნებთან, კვლავ უკანონო იქნება. ბაზარი მკაცრად დარეგულირდება, ამიტომ მისი ყიდვა ადვილი არ იქნება.

თავდაპირველი გეგმა, რომლის მიხედვით, კანაფის გაყიდვის საშუალება ექნებოდათ ლიცენზირებულ მაღაზიებსა და აფთიაქებს, გაუქმდა ევროკავშირის შეშფოთების გამო, რომ ამას შეიძლება ნარკოტიკის ექსპორტის ზრდა გამოეწვია.

• ამის ნაცვლად, გაიზრდება არაკომერციული წევრების კლუბები, რომლებსაც „კანაფის სოციალური კლუბები“ ეწოდება. ეს კლუბები ნარკოტიკს შეზღუდული რაოდენობით გაავრცელებს.
• თითოეულ კლუბის ზედა ზღვარი 500 წევრი იქნება, ადგილზე კანაფის მოხმარება დაუშვებელი იქნება და წევრობა მხოლოდ გერმანიის მოქალაქეებისთვის იქნება ხელმისაწვდომი.
• ასევე, ნებადართული იქნება საკუთარი კანაფის მოშენება — თითო ოჯახს მარიხუანის სამამდე მცენარის გაზრდა შეეძლება.

რეგულარული მწეველებისთვის ახალი კანონი სარგებლის მომტანი იქნება, მაგრამ იშვიათად მომხმარებლებისთვის მარიხუანის შეძენა გართულდება, ტურისტებისთვის კი — შეუძლებელი იქნება მისი ყიდვა. კრიტიკოსები ამბობენ, რომ ეს ყველაფერი შავ ბაზარს კიდევ უფრო გააძლიერებს.

• იმავდროულად, ოპოზიციაში მყოფი კონსერვატორები ამბობენ, რომ მომავალ წელს, მთავრობაში მოხვედრის შემთხვევაში, კანონს მთლიანად გააუქმებენ.