მოსკოვში აზერბაიჯანელი ფიტნეს ბლოგერი დააკავეს, შემდეგ კი — გაათავისუფლეს. მასზე სომხეთს, მკვლელობის ბრალდებით, საერთაშორისო ძებნა აქვს გამოცხადებული.

ქამილ ზეინალი მოსკოვის დომოდედოვოს აეროპორტში ოთხშაბათს დააკავეს. მისმა ადვოკატმა განაცხადა, რომ რუსეთმა ჰუმანიზმი გამოიჩინა“ და ზეინალი გაათავისუფლეს.

სომხეთის შინაგან საქმეთა სამინისტრომ ადგილობრივ მედიას დაუდასტურა, რომ ზეინალის მიმართ გამოიცა "სახელმწიფოთაშორისი დაკავების ორდერი". აზერბაიჯანის ელჩმა რუსეთში, მოგვიანებით, განაცხადა, რომ ის დამოუკიდებელ სახელმწიფოთა თანამეგობრობის (დსთ) ძებნილთა სიაში იყო. ამ ორგანიზაციას რუსეთი ხელმძღვანელობს.

გათავისუფლებამდე ზეინალიმ ინსტაგრამზე ვიდეო გაავრცელა და აზერბაიჯანის მთავრობას მხარდაჭერა სთხოვა.

"მეუბნებიან, ან სომხეთს ჩაგაბარებთ, ან — ისინი მოვლენ და წაგიყვანენ“, — თქვა ზეინალიმ. "მათ მითხრეს, რომ ხვალ სასამართლოში მიმიყვანენ.“

მისი თქმით, რუსეთის პოლიციამ განუცხადა, რომ ის 2023 წლის მაისიდან იძებნებოდა, მაგრამ მას შემდეგ სამჯერ იმყოფებოდა რუსეთში და არ დაუკავებიათ.

სომეხი ოფიციალური პირები ამბობენ, რომ ბლოგერი მკვლელობაშია ბრალდებული, თუმცა აზერბაიჯანის ელჩმა რუსეთში განაცხადა, რომ სომხეთმა მოითხოვა ზეინალის დაპატიმრება დსთ-ს ფარგლებში, ხუთი სისხლის სამართლის ბრალდებით.

აზერბაიჯანული მედიის ინფორმაციით, ზეინალის, სხვა დანაშაულებთან ერთად, ბრალად ედება კაცობრიობის წინააღმდეგ ჩადენილი დანაშაულები, ომის დანაშაულები და დაქირავებულთა რეკრუტირება.

ელჩმა თქვა, რომ საელჩო ელოდება სასამართლოს გადაწყვეტილებას, რომელიც შეაფასებს, რამდენად მართებულია სომხეთის მოთხოვნა.

სომხურმა მედიამ დაწერა, რომ ბლოგერმა, 2020 წლის მეორე მთიანი ყარაბაღის ომის დროს, მთიანი ყარაბაღში ასაკოვანი სომეხი მამაკაცი მოკლა, რის შემდეგაც, მკვლელობის ამსახველი კადრები სოციალურ ქსელებში გაავრცელა.

ზეინალის ადვოკატმა ალაკბარ გარაევმა ჟურნალისტებს უთხრა, რომ დაკავების ორდერი ეხებოდა ზეინალის ვიზიტს მთიან ყარაბაღში, 2020 წლის 29 სექტემბერს.

გარაევის მტკიცებით, ბლოგერი შევიდა ადგილობრივების სახლებში, გადაიღო ვიდეომასალა და სოციალურ ქსელში გაავრცელა.

მან, ასევე, აღნიშნა, რომ ზეინალი არასოდეს შესულა სომხეთის ტერიტორიაზე და არც დანაშაული ჩაუდენია, შესაბამისად, სომხეთის მიერ აღძრული საქმე ბათილია.

სომხეთის ვიცე-პრემიერმა, მჰერ გრიგორიანმა ხუთშაბათს ჟურნალისტებს განუცხადა, რომ დარწმუნებულია, საქმეზე შემდგომი ზომები იქნება მიღებული.

კითხვაზე, გაუგზავნიან თუ არა რუსეთს საპროტესტო ნოტას, გრიგორიანმა განაცხადა, რომ მოვლენებს წინ არ გაუსწრებს და ზომებს მიიღებენ მას შემდეგ, რაც რუსეთის ოფიციალური პასუხი გახდება ცნობილი.

სომხეთის პროკურატურამ იმავე დღეს განაცხადა, რომ ზეინალის დაკავებისა და გადაცემის შესახებ დოკუმენტები რუსეთის გენერალურ პროკურატურას გაუგზავნა.

Qafqazinfo-ს ინფორმაციით, ზეინალი აზერბაიჯანელმა სამართალდამცავებმა 2020 წელს არაერთხელ დააკავეს: ჯერ წვრილმანი ხულიგნობისთვის, მოგვიანებით, კარანტინის დარღვევისთვის, ხოლო ოქტომბერში აზერბაიჯანული სამხედრო ტექნიკის გადაადგილების ამსახველი ვიდეოს გავრცელებისთვის.

Infocom-მა კი აღნიშნა, რომ ზეინალი 2020 წელს დაადანაშაულეს სომეხი კაცის თავის მოკვეთაში ჰადრუტში, ასევე, მოსკოვში სომხების მიმართ ძალადობრივ ქმედებებში.

სომხეთის ოფიციალური პირები ამ ინფორმაციას არ ადასტურებენ.

ზეინალი ბაქოში ხუთშაბათს დაბრუნდა.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.