მოკლედ: დამოუკიდებელი რუსული მედიის, მედუზას ინფორმაციით, რუსეთში გაყიდვებიდან ამოიღეს გაზეთი სობესედნიკი, რომლის პირველ გვერდზეც ალექსეი ნავალნის ფოტო იყო გამოსახული.

დეტალები: მედუზასთან, გაზეთ სობესედნიკის ჟურნალისტმა, ელენა მილჩანოვსკამ თქვა, რომ ხელისუფლებამ გაზეთის ნომერი ამოიღო სადისტრიბუციო პუნქტებიდან, ძირითადად, საგაზეთო ჯიხურებიდან "ყველგან, ან თითქმის ყველგან".

  • ამის გამო, გაზეთმა, დაახლოებით, 300 000 რუბლით იზარალა.
  • გამოცემის ჟურნალისტისთვის გაუგებარია მიზეზი, რადგან ამბობს, რომ ნავალნის ფოტოს დაბეჭდვით, არ დაურღვევიათ არც ერთი კანონი, რომელიც მედიისთვის რუსეთის სახელმწიფო მარეგულირებელმა კომპანიამ, როსკომნადზორმა დააწესა მას შემდეგ, რაც პუტინმა დაიწყო სრულმასშტაბიანი ომი უკრაინაში.
  • სობესედნიკის ჟურნალისტმა ისიც აღნიშნა, რომ ბოლო ორი წლის განმავლობაში გაზეთმა, შემოსავლის მრავალი წყარო დაკარგა, რადგან როსკომნადზორი მუდმივად ბლოკავს გამოცემის ყველა ვებსაიტს. გუშინ, 21 თებერვალს, დაიბლოკა გაზეთის კიდევ ერთი ახალი ვებგვერდი, სადაც გამოქვეყნდა გაზეთის ყველა მასალა ალექსეი ნავალნის შესახებ.
  • ასევე, მედუზას მკითხველმაც დაუდასტურა, რომ გაზეთის ნომერს ახალი ამბების ჯიხურში ეძებდა, თუმცა, ვერ იპოვა. მკითხველის თქმით, პრესის ჯიხურის გამყიდველმა უთხრა, რომ მიიღეს ბრძანება, არ გაეყიდათ გაზეთი. მკითხველს მედიასთან არ დაუკონკრეტებია, რომელ ქალაქში მოხდა ეს.
  • საგულისხმოა, რომ გაზეთი სობესედნიკი რუსეთში გამოიცემა 1984 წლიდან და რეგულარულად წერს მასალებს ოპოზიციის შესახებ.

ბოლო ხაზი: 2024 წლის 16 თებერვალს რუსეთის ფედერალური სასჯელაღსრულების სამსახურმა გაავრცელა ცნობა, რომ ოპოზიციონერი პოლიტიკოსი, ალექსეი ნავალნი სპეციალური რეჟიმის კოლონიაში გასეირნების შემდეგ გარდაიცვალა.

  • გარდაცვალების მიზეზი ჯერჯერობით უცნობია.
  • ოპოზიციონერის თანამოაზრეები მიიჩნევენ, რომ ის მოკლეს და კრემლი დანაშაულის კვალის დამალვას ცდილობს.
  • ლუდმილა ნავალნაიამ, შვილის გარდაცვალების შემდეგ, თქვა, რომ რამდენიმე დღის წინ მასთან პაემანზე იმყოფებოდა ციხეში. დედის თქმით, პოლიტიკოსი თავს კარგად გრძნობდა და ჯანმრთელობას არ უჩიოდა.
  • ამაზე მეტყველებს გარდაცვალებამდე ერთი დღით ადრე, 15 თებერვალს, ნავალნის ვიდეო-ჩართვა სასამართლოზე.

გაიგე მეტი: ბრიტანეთმა სანქციები დაუწესა იმ ციხის დირექტორს და მოადგილეებს, სადაც ალექსეი ნავალნი გარდაიცვალა