საქართველოსა და უკრაინის პრეზიდენტებმა ქვეყნებს შორის სტრატეგიული ურთიერთობების ჩამოყალიბებას ხელი მოაწერეს. დეკლარაციას ხელი უკრაინის პრეზიდენტის, პეტრო პოროშენკოს ვიზიტის ფარგლებში მოეწერა ხელი.

დღესვე, საქართველოს მთავრობასა და უკრაინის მინისტრთა კაბინეტს შორის განათლებისა და მეცნიერების სფეროში თანამშრომლობის თაობაზე შეთანხმებას ხელი მოეწერა.

"ერთობლივი დეკლარაცია მიზნად ისახავს ორ ქვეყანას შორის მჭიდრო პოლიტიკური და ეკონომიკური ურთიერთობების შემდგომ განვითარებას და საერთო ინტერესებისა და ქვეყნების წინაშე არსებული მსგავსი გამოწვევების გათვალისწინებით, მხარეებს შორის ორმხრივ და მრავალმხრივ ფორმატებში არსებული მჭიდრო პარტნიორული თანამშრომლობის კიდევ უფრო განმტკიცებას", - აცხადებენ პრეზიდენტის ადმინისტრაციაში.

დეკლარაციით სხვა პოლიტიკურ საკითხებთან ერთად გათვალიწისნებულია, სხვადასხვა პოლიტიკური და სამართლებრივი საშუალებების გამოყენებით, რუსეთის ფედერაციის მიმართ ზეწოლის შენარჩუნების მიზნით, მრავალმხრივ ფორმატებში ურთიერთმხარდაჭერა.

პეტრო პოროშენკო საქართველოში გუშინ, 17 ივლისს ჩამოვიდა. მისი ვიზიტის ფარგლებში, საქართველოს პრეზიდენტის შეხვედრის გარდა, დაგეგმილია:

  • სოფელ ხურვალეთში საოკუპაციო ხაზთან მისვლა;
  • შეხვედრები პრემიერ-მინისტრთან და საქართველოს პარლამენტის თავმჯდომარესთან;
  • საქართველო - უკრაინის ბიზნესფორუმში მონაწილეობა;
  • სვანეთსა და აჭარაში ჩასვლა;
  • მესტიაში მარგიანების სახლ-მუზეუმს, ისტორიისა და ეთნოგრაფიის მუზეუმს, ასევე,ტრადიციულ სვანურ კოშკს დათვალიერება;
  • აჭარის ავტონომიური რესპუბლიკის მთავრობის თავმჯდომარეს ზურაბ პატარაძეს შეხვდება;
  • უკრაინის საინვესტიციო ფორუმს გახსნის და მის მუშაობაში მიიღებს მონაწილეობას.