მოკლედ: ინტერპრესნიუსის ინფორმაციით, გიორგი ვახტანგაშვილს, რომელსაც 2022 წლის 13 ოქტომბერს, ვაკის პარკში მომხდართან დაკავშირებით, სამსახურებრივი გულგრილობის ბრალდებით 3-წლიანი თავისუფლების აღკვეთა აქვს მისჯილი, სასჯელი შინა პატიმრობითა და სპეციალური ელექტრონული მონიტორინგით შეეცვალა.

  • On.ge დეტალების გასარკვევად სასჯელაღსრულებას დაუკავშირდა, თუმცა, მათ კომენტარი არ გააკეთეს.

დეტალები: ვახტანგიშვილის ადვოკატმა, კახა წერეთელმა ინტერპრესნიუსთან თქვა, რომ ვინაიდან ბრალდებული წელიწადი და 3 თვე ციხეში იჯდა, კანონით შესაძლებელი იყო სასჯელის შინაპატიმრობით ჩანაცვლება: "სასჯელაღსრულების დეპარტამენტის შესაბამისმა კომისიამ მის მიმართ სასჯელის შინაპატიმრობით შეცვლის საკითხი განიხილა. აღნიშნული დაკმაყოფილდა, ვინაიდან ის ნაკლებად მძიმე დანაშაულისთვისაა გასამართლებული", — თქვა კახა წერეთელმა.

რა ვიცით გიორგი ვახტანგიშვილზე: 2023 წლის ივლისში, საქმესთან დაკავშირებით, 8 პირს მიესაჯა პატიმრობა, მათ შორის, გიორგი ვახტანგიშვილს.

  • გიორგი ვახტანგიშვილი თბილისის მერიის გარემოს დაცვის საქალაქო სამსახურის ყოფილი უფროსის, მსჯავრდადებული გიგა გიგაშვილის ყოფილი მოადგილე იყო.
  • სასამართლომ გიორგი ვახტანგიშვილსა და გიგა გიგიშვილს 3-3 წელი მიუსაჯა.

რა მოხდა ვაკის პარკში: 2022 წლის 13 ოქტომბერს ვაკის პარკის შადრევანში ჩასულ ბავშვებს დენმა დაარტყა. 13 წლის მარიტა მეფარიშვილი გარდაიცვალა, ხოლო 2 ბავშვი დაშავდა.

  • უგონო მდგომარეობაში მყოფი ბავშვები შადრევნიდან მებაღემ, დევი მეზურნიშვილმა ამოიყვანა.
  • ამ საქმეზე მიმდინარე გამოძიების ფარგლებში 9 პირი დააკავეს: ექსპერტები, ელექტროშემდუღებლები, გრინსერვისის დირექტორი და მერიის გარემოს დაცვის სამსახურის უფროსის მოადგილე.
  • დაკავებულებს ბრალი სხვადასხვა მუხლით წარუდგინეს, მათ შორის, სამსახურებრივ გულგრილობაზე, რამაც სიცოცხლის მოსპობა გამოიწვია, ყალბი დოკუმენტების დამზადებაში წაქეზებაზე, დამზადებასა და გამოყენებაზე.

გაიგე მეტი: ვაკის პარკის საქმეზე 9-დან 8 პირს პატიმრობა მიესაჯა