ცნობილი სამხრეთკორეული ჯგუფის Blackpink-ის წევრი ლალისა "ლისა" მანობანი The White Lotus-ის სამსახიობო გუნდს შეუერთდა. K-pop ვარსკვლავს მაყურებელი HBO-ის გახმაურებული სერიალის მესამე სეზონში იხილავს. ჯერჯერობით უცნობია, რა როლს შეასრულებს მომღერალი.

The White Lotus-ის ახალ სეზონზე კი ისედაც არ ვიცით მაინცდამაინც ბევრი რამ. გამოცემა Variety-ის ცნობით, მისი გადაღებები ტაილანდში დაიწყება თებერვლის თვეში. რა თქმა უნდა, ახალ სეზონში ახალ გმირებს — "თეთრი ლოტოსის" ახალ დამსვენებლებს — გავიცნობთ. თუმცა, სიუჟეტის შესახებ სხვა დეტალები მკაცრად გასაიდუმლოებულია.

The White Lotus, რომლის პირველი სეზონის პრემიერა 2021 წელს შედგა, HBO-ის ერთ-ერთ ყველაზე წარმატებულ პროექტად იქცა. ამერიკელი რეჟისორისა და სცენარისტის, მაიკ უაითის, შექმნილი სერიალი შავი კომედია, სოციალური სატირაა. თითოეულ სეზონში მოქმედება ვითარდება "თეთრი ლოტოსის" ქსელის სხვადასხვა სასტუმროში (პირველ სეზონში ეს იყო ჰავაიზე, მეორეში — სიცილიაზე), სიუჟეტი კი განსხვავებული წარმომავლობის დამსვენებლების გარშემო ტრიალებს. სერიალის პირველი სეზონი Emmy-ის 20 ნომინაციაში იყო წარდგენილი, საიდანაც 10-ში გაიმარჯვა კიდეც, მეორე სეზონმა კი 23 ნომინაცია და 5 ჯილდო დაიმსახურა.

///

რაც შეეხება მანობანს, ტაილანდელი რეპერისა და მომღერლისთვის The White Lotus-ში მონაწილეობა სამსახიობო დებიუტი იქნება. ის Blackpink-ის მეორე წევრია, რომელიც HBO-ის სერიალში გამოჩნდება (ჯენიმ გასულ წელს The Idol-ში შეასრულა როლი).

Blackpink ერთ-ერთ ყველაზე წარმატებული სამხრეთკორეული ჯგუფია. ოთხი გოგოსგან შემდგარმა ჯგუფმა პირველი ჩანაწერი Square One 2016 წელს გამოუშვა. მას შემდეგ Blackpink-მა არაერთი მსოფლიო რეკორდი დაამყარა. რეკორდები პირადადაც აქვს დამყარებული მანობანს, რომელმაც 2021 წელს პირველი სოლო ალბომი (Lalisa) გამოუშვა და პირველივე კვირაში მისი 736 ათასზე მეტი ასლი გაყიდა სამხრეთ კორეაში.

ასევე იხილეთ: