საქართველოს ელჩმა ამერიკის შეერთებულ შტატებში, დავით ბაქრაძემ, დღეს, თბილისში მიმდინარე "ამბასადორიალი 2017-ზე" ჟურნალისტებთან საქართველო-აშშ-ს შორის სტრატეგიული პარტნიორობის მნიშვნელობაზე ისაუბრა.

"ოკუპაციის არაღიარების კუთხით, აშშ-ს მაგალითზე ვიტყვი ძალიან კონკრეტულ ინიციატივებს. იყო საკანონმდებლო ცვლილება და საქართველოს ტერიტორიის ოკუპაცია, აშშ-ში უკვე კანონის ენით არის დაფიქსირებული. ასევე, რეზოლუცია, რომელსაც შტატების კონგრესი მიიღებს, შეეხება იმ მხარდაჭერას, რომელიც მის პოლიტიკაში გამოიხატება. აშშ-სთან სტრატეგიული პარტნიორობა გვაკავშირებს და ეს თავდაცვისა და უსაფრთხოების სფეროში შეიარაღების მოდერნიზაციას ეხება. ასევე, იმ ახალ გამოწვევებს, რომელიც რუსეთის მხრიდან რბილი ძალის სახით გამოიყენება".

დავით ბაქრაძის მიერ აშშ-ს კანონმდებლობაში საქართველოს ოკუპაციასთან დაკავშირებულ კანონში იგულისხმება პრეზიდენტ ტრამპის მიერ მიმდინარე წლის მაისში ხელმოწერილი კანონი ბიუჯეტის შესახებ. აღნიშნული აქტის მიხედვით. აშშ-ს სახელმწიფო დახმარებას ვერცერთი ის სახელმწიფო ვერ მიიღებს, რომელიც არ აღიარებს საქართველოს ტერიტორიულ მთლიანობას.

თბილისში "ამბასადორიალი 2017" გაიხსნა, რომელსაც ესწრებიან საქართველოს დიპლომატიური მისიების ხელმძღვანელები, ასევე პრეზიდენტი, პარლამენტის თავმჯდომარე და საგარეო საქმეთა მინისტრი. მათ უკვე მიმართეს სიტყვით დამსწრე საზოგადოებას.