თბილისში ამბასადორიალი 2017 გაიხსნა, რომელსაც ესწრებიან საქართველოს დიპლომატიური მისიების ხელმძღვანელები, ასევე პრეზიდენტი, პარლამენტის თავმჯდომარე და საგარეო საქმეთა მინისტრი. მათ უკვე მიმართეს სიტყვით დამსწრე საზოგადოებას.

"ჩვენს ძირითად გამოწვევად ჩვენი ტერიტორიების ოკუპაცია რჩება, ჩვენი ტერიტორიული მთლიანობა და სუვერენიტეტი, საერთაშორისო საზოგადოების მაქსიმალური ჩართულობით, საერთაშორისო ფორმატების მაქსიმალური გამოყენებით, მშვიდობიანი გზით, ჩვენი ქვეყნის დეოკუპაცია. ამ მიმართულებით ჩვენმა დიპლომატიამ განსაკუთრებულ წარმატებას მიაღწია, რომელსაც ვაფასებთ. ეს გამოიხატა უპრეცენდენტო გადაწყვეტილებებით როგორც გაეროს ფარგლებში, ასევე ევროპის საბჭოსა და პარტნიორების გადაწყვეტილებებში".

ჯანელიძის თქმით, ამ გადაწყვეტილებებით მოხდა საქართველოს მიმართ რუსული აგრესიის როგორც სამართლებრივი, ასევე პოლიტიკური შეფასება. როგორც საგარეო საქმეთა მინისტრი ამბობს, ეს დეოკუპაციის პრობლემას ვერ წყვეტს, მაგრამ მისცემს მყარ საფუძველს, რომ საქართველოს ოკუპირებული რეგიონების აღიარება ვერ მოხდება.

"საქართველოს ექნება სრული მხარდაჭერა, რომ სამართლებრივ ჩარჩოებში, სამართლის პრინციპების შესაბამისად, შექმნის საფუძველს კონფლიქტის მშვიდობიანი დარეგულირებისთვის", - განაცხადა მიხეილ ჯანელიძემ.