საპარლამენტო უმცირესობის წევრებს მიაჩნიათ, რომ საკონსტიტუციო სასამართლოს შესახებ კანონში ცვლილებები დაჩქარებული წესით იმიტომ მიიღო პარლამენტმა, რომ რუსთავი 2-ისა და გიგი უგულავას საქმეებზე გავლენა მოეპოვებინა. მათი განმარტებით, რუსთავი 2-ის საქმის მოსამართლეს, მერაბ ტურავას პარლამენტმა კანონში შეტანილი ცვლილებებით საშუალება მისცა საქმის სარჩელები პლეუნმისათვის გადაეცა.

როგორც ერთიანი ნაციონალური მოძრაობის წევრმა, სერგო რატიანმა განმარტა, ტურავამ უკვე რამდენჯერმე გამოიჩინა თავი იმით, რომ მოახდინა სასამართლოს სისტემას პარალიზება:

"ტურავას სახელი ალბათ შევა საქართველოს უახლეს ისტორიაში როგორც ცალკე მოვლენა, როგორც მაგალითი იმისა, თუ როგორ შეიძლება მოსამართლე ცუდად მოიქცეს, როგორ იყოს ისე თავისი პროფესიის წინააღმდეგ მიმართული".

ასევე ენმ-ს წევრმა, ლევან თარხნიშვილმა განაცხადა, რომ ნათელია, თუ რას ემსახურებოდა უმრავლესობის წევრის, ეკა ბესელიას ქმედება, დაჩქარებულად შესულიყო საკონსტიტუციო სასამართლოს შესახებ კანონში ცვლილებები:

"ბატონი ტურავა რისთვის მიავლინა პარლამენტმა საკონსტიტუციო სასამართლოში, თავიდანვე ცხადი იყო. გიგი უგულავასა და დღევანდელ საქმეზე დღეს მისი აქტივობით ნათლად ჩანს, რომ ასრულებს ხელისუფლებისა და პირადად ბიძინა ივანიშვილის დავალებას.

საკონსტიტუციო სასამართლოს მოსამართლემ, მერაბ ტურავამ რუსთავი 2-ის საქმის სარჩელების განხილვის მოთხოვნით პლენუმს, საკონსტიტუციო სასამართლოს შესახებ კანონში შეტანილი ცვლილებების შესაბამისად, 7 ივნისს, მიმართა:

"მივმართავ საკონსტიტუციო სასამართლოს პლენუმს შპს სამაუწყებლო კომპანია რუსთავი 2-ისა და შპს ტელეკომპანია საქართველოს ზოგიერთი სარჩელის საკონსტიტუციო სასამართლოს პირველი კოლეგიიდან პლენუმისთვის გადაცემის და პლენუმის მიერ განხილვის თაობაზე".

აღსანიშნავია, რომ გიგი უგულავას საქმის 7 ივნისს დანიშნული სასამართლოს სხდომაც სწორედ საქმის სარჩელის პლენუმისადმი გადაცემის მიზეზით გადაიდო.

აღნიშნული გადაწყვეტილების მიღების საშუალება მოსამართლეებს მას შემდეგ მიეცათ, რაც საკონსტიტუციო სასამართლოს შესახებ კანონში შევიდა ერთ-ერთი ცვლილება, რომლის მიხედვითაც, ერთ მოსამართლეს შეუძლია კოლეგიაში საქმის განხილვის ნებისმიერ ეტაპზე საქმე პლენუმს გადასცეს განსახილველად.