მოსამართლე მერაბ ტურავას მიერ რუსთავი 2-ის სარჩელების პლენუმისადმი გადაცემას საპარლამენტო უმრავლესობის წევრები აფასებენ. როგორც ეკა ბესელიამ განმარტა, ვინაიდან კანონი უკვე ამოქმედებულია, მისი გამოყენება ნებისმიერ მოსამართლეს შეუძლია და ამაში გასაკვირი არაფერია.

ბესელიამ სწორედ რუსთავი 2-ის ჟურნალისტს მიმართა და უთხრა, რომ განცდა აქვს, თითქოს ტელეკომპანიას პერსონალური სამიზნეები ჰყავს, რომელსაც რუსთავი 2 თავის მტრად მიიჩნევს:

"ასეთ პერსონალურ ჩამონათვალში სიაში პირველ ნომერს ვერავინ ვერ წაართმევს ბიძინა ივანიშვილს, თქვენი ყოველდღიური მუშაობის მუზაა. სადღაც ამ ჩამონათვალში, თუ სამეულში არა, ხუთეულში ნამდვილად მეც ვხვდები. ბევრი პერსონალური თავდასხმა მიმიღია თქვენი ტელევიზიის მხრიდან და მივეჩვიე, რომ ყოველდღე ახალ ისტორიებს გამოაცხობთ ხოლმე".

მრეწველების წევრმა, ზურაბ ტყემალაძემ კი განაცხადა, რომ მოსამართლე ტურავას მიერ ახალი კანონის გამოყენებას პოლიტიკური მიზეზები არ აქვს:

"რუსთავი 2-ის საქმე საზოგადოების მაღალი ინტერესის მქონე საკითხია. კანონმდებლობის მიხედვით, პლენუმმა უნდა განიხილოს. ეს გაიზიარა ვენეციის კომისიამ, ეს გაიზიარა პრეზიდენტმაც, გავიზიარეთ ჩვენც პრეზიდენტის შენიშვნები".

საკონსტიტუციო სასამართლოს მოსამართლემ, მერაბ ტურავამ რუსთავი 2-ის საქმის სარჩელების განხილვის მოთხოვნით პლენუმს, საკონსტიტუციო სასამართლოს შესახებ კანონში შეტანილი ცვლილებების შესაბამისად, 7 ივნისს, მიმართა:

"მივმართავ საკონსტიტუციო სასამართლოს პლენუმს შპს სამაუწყებლო კომპანია რუსთავი 2-ისა და შპს ტელეკომპანია საქართველოს ზოგიერთი სარჩელის საკონსტიტუციო სასამართლოს პირველი კოლეგიიდან პლენუმისთვის გადაცემის და პლენუმის მიერ განხილვის თაობაზე".

აღსანიშნავია, რომ გიგი უგულავას საქმის 7 ივნისს დანიშნული სასამართლოს სხდომაც სწორედ საქმის სარჩელის პლენუმისადმი გადაცემის მიზეზით გადაიდო.

აღნიშნული გადაწყვეტილების მიღების საშუალება მოსამართლეებს მას შემდეგ მიეცათ, რაც საკონსტიტუციო სასამართლოს შესახებ კანონში შევიდა ერთ-ერთი ცვლილება, რომლის მიხედვითაც, ერთ მოსამართლეს შეუძლია კოლეგიაში საქმის განხილვის ნებისმიერ ეტაპზე საქმე პლენუმს გადასცეს განსახილველად.