გარემოსდაცვითი ორგანიზაცია Riposte Alimentaire-ის წევრებმა პარიზის ლუვრის მუზეუმში და ვინჩის მონა ლიზას გოგრის წვნიანი შეასხეს. აქტივისტები ფერმერების უფლებების დაცვასა და ჯანსაღ საკვებზე წვდომას ითხოვდნენ. მონა ლიზას შუშა იცავს, რის გამოც ნახატი ინციდენტისას არ დაზიანებულა.

მუზეუმის დაცვის წევრებმა ინციდენტის შემდეგ მნახველები ოთახიდან გაიყვანეს და დარბაზი დაახლოებით ორ საათში ხელმეორედ გახსნეს. მათი თქმით, მუზეუმი საჩივრის დაწერას აპირებს.

სოციალურ ქსელში გავრცელებულ ვიდეოში ორი აქტივისტი ქალი ჩანს, რომელთაც მაისურზე ორგანიზაციის სახელი აწერიათ და ფრანგულ ენაზე ფერმერების უფლებების დაცვას ითხოვენ.

"რა უფრო მნიშვნელოვანია, ხელოვნება თუ ჯანსაღ საკვებზე წვდომა? საფრანგეთის აგრიკულტურული სისტემა საშინელ დღეშია. ჩვენი ფერმერები სამუშაოზე იხოცებიან", — ამბობს ერთ-ერთი.

მოგვიანებით აქტივისტებმა სოციალურ ქსელში განცხადებაც გაავრცელეს, სადაც ამბობენ, რომ პროტესტით სახელმწიფო სასურსათო პროგრამის გაუმჯობესებას ითხოვენ. ბოლო დღეებია პარიზში ფერმერების საპროტესტო აქციები იმართება, რომლებიც საწვავის მზარდი ხარჯების შეწყვეტას და რეგულაციების გამარტივებას ითხოვენ.

მათ რამდენიმე დღის წინ სამანქანო გზებიც გადაკეტეს. აქტივისტები ითხოვენ, რომ ყოველ თვეში მოქალაქეებს საკვები პროდუქტებისთვის სასურსათო ბარათი გადაეცეთ 150 ევროს ოდენობით.

საფრანგეთის კულტურის მინისტრმა, რაშიდა დათიმ, განაცხადა, რომ მონა ლიზას დაზიანების მცდელობას არც ერთი მიზეზი არ ამართლებს, რადგან ის შთამომავლობას უნდა შემორჩეს.

მონა ლიზა დამცავ შუშაში 1950-იანი წლების ჩასვეს, მას შემდეგ, რაც ერთ-ერთმა ვიზიტორმა მისი მჟავით დაზიანება სცადა. 2019 წლიდან კი მას ტყვიაგაუმტარი შუშა იცავს.