რა ხდება: თბილისის საქალაქო სასამართლოს მოსამართლის, ქეთევან ჯაჭვაძის გადაწყვეტილებით, წყნეთის პოლიციის ყოფილ უფროსს, დიმიტრი ქვაჭრელიშვილსა და მის ყოფილ მოადგილეს, ამირან ნაჭყებიას, აღკვეთის ღონისძიების სახით პატიმრობა შეეფარდათ.

• გადაწყვეტილება 27 იანვარს გამართულ სასამართლო სხდომაზე გამოცხადდა, რომელსაც ბრალდებული პოლიციის ყოფილი მაღალჩინოსანიც ესწრებოდა.
• დაკავებულებს პროკურატურა ბრალს დებს ქრთამის აღებასა და უფლებამოსილების გადამეტებაში.
• პროკურატურის მიხედვით, რუსეთის მოქალაქე ამბობს, რომ ქვაჭრელიშვილმა მას, ქრთამის სახით, 3500 დოლარი გამოართვა.
• ქვაჭრელიშვილმა სასამართლოს სიტყვით მიმართა.

ბრალდებული ქვაჭრელიშვილის პოზიცია: "არც ქრთამი მაქვს აღებული, არც მასზე [რუსეთის მოქალაქეზე] ფიზიკურად მიძალადია. ვიღაც რუსი "ბანდის" "ბარიგა" პიროვნების ნათქვამზე ვარ დაპატიმრებული ამჟამად. მე, პოლიციის პოლკოვნიკი, 90-იანი წლებიდან რომ პოლიციაში ვმუშაობ, ამას რომ ვამბობ, აი, ეს არის ყველაფერი", — თქვა მან და "ჩაიგდე ხმა!" — ასე მიმართა პროკურატურის წარმომადგენელს რეპლიკის საპასუხოდ, როდესაც სასამართლო სხდომაზე სიმშვიდისაკენ მოუწოდეს.

სტრიქონებს შორის: დიმიტრი ქვაჭრელიშვილი იყო ერთ-ერთი მთავარი მოწმე 2022 წლის სისხლის სამართლის საქმეზე, როდესაც სა­პო­ლი­ციო ღო­ნის­ძი­ე­ბა­ს მოქალაქე ზუ­რაბ გველე­სი­ა­ნის სი­ცო­ცხლე ემსხვერ­პლა. მას ქვაჭრელიშვილის სამმართველოს დეტექტივის, ერიკ წურწუმიას იარაღიდან გავარდნილი ტყვია მოხვდა. სამმართველოს დეტექტივმა, ერიკ წურწუმიამ სასმართლოს უთხრა, რომ ადგილზე მის უფროსთან, დიმიტრი ქვაჭრელიშვილთან ერთად იმყოფებოდა.

რა მტკიცებულები აქვს პროკურატურას დაკავებულთა წინააღმდეგ: პროკურატურის ვერსიით, საქმეზე ჩატარებული გამოძიებით დადგინდა, რომ

• ძველი თბილისის მთავარი სამმართველოს პოლიციის მე-4 სამმართველოს აწ უკვე ყოფილმა უფროსმა, ქვაჭრელიშვილმა, მოქალაქე ყოველგვარი სამართლებრივი საფუძვლის გარეშე დაადანაშაულა ნარკოდამოკიდებულებაში.
• მოქალაქეს დაპატიმრებით დაემუქრა და ფსიქოლოგიური ძალადობის გზით, 3500 აშშ დოლარის ოდენობით ქრთამი გამოსძალა.
• მისი მოადგილე ამირან ნაჭყებია კი, რუსეთის მოქალაქის საცხოვრებელ სახლში მივიდა, სადაც ყოველგვარი სამართლებრივი საფუძვლის გარეშე ჩაატარა უკანონო ჩხრეკა.
• "ვითომდა ნივთმტკიცების სახით, მართლსაწინააღმდეგო მისაკუთრების მიზნით, მოქალაქისა და მასთან ერთად მცხოვრები სხვა პირის კუთვნილი პირადი ნივთები ამოიღო, რითაც დაზარალებულებს მნიშვნელოვანი მატერიალური ზიანი მიადგათ", — აცხადებს პროკურატურა.
• პროკურატურა დაკავებულებისათვის აღკვეთის ღონისძიების სახით პატიმრობის გამოყენების შუამდგომლობით სასამართლოს კანონით დადგენილ ვადაში მიმართავს.

ბოლო ხაზი: სისხლის სამართლის საქმეზე გამოძიება გრძელდება.