ახლახან სამხრეთ კორეის საკვებისა და მედიკამენტების უსაფრთხოების სამინისტრომ მოსახლეობას მოუწოდა, რომ სახამებლისგან დამზადებული შემწვარი კბილის ჩხირები აღარ შეჭამონ. ეს საკითხი მას შემდეგ გახდა აქტუალური, რაც სოციალურ ქსელებში ვირუსულად გავრცელდა ვიდეოები, რომლებშიც სახამებლისგან დამზადებულ კბილის ჩხირებს სხვადასხვა სანელებელთან ერთად ჭამენ.

"არ არის დადასტურებული, რომ კბილის ჩხირების საკვებად გამოყენება უსაფრთხოა. გთხოვთ, არ შეჭამოთ", — წერს სამხრეთ კორეის საკვებისა და მედიკამენტების უსაფრთხოების სამინისტრო სოციალურ ქსელებში, თუმცა ამის მიუხედავად, ვიდეოების გავრცელება ისევ გრძელდება.

///

სამხრეთ კორეაში კარტოფილის ან სიმინდის სახამებლისგან დამზადებულ კბილის ჩხირებს საღებავსაც უმატებენ, რათა მწვანე ფერი ჰქონდეს. ვირუსულად გავრცელებულ ვიდეოებში კი კბილის ჩხირებს, რომელიც რეალურად სანიტარული პროდუქტია, ზეთში ავლებენ და წვავენ.

შემწვარი კბილის ჩხირების ტრენდს ის ფაქტიც უწყობს ხელს, რომ სამხრეთ კორეაში ე.წ. მუკბანგის ვიდეოები ძალიან პოპულარულია. ასეთ ვიდეოებში ადამიანები დიდი რაოდენობით საკვებს ჭამენ, ან უჩვეულო კერძებს აგემოვნებენ, რასაც ბევრი მაყურებელი ჰყავს. ტიკტოკზე ვიდეოებს უკვე შემწვარი კბილის ჩხირების შესახებაც იღებენ, ერთ-ერთი ტიკტოკერის თქმით კი, ასე მომზადებული კბილის ჩხირები "ძალიან ხრაშუნაა".